افغان حکومت په تازه څرګندونو کې ویلي چې پاتې بین الافغاني مذاکرات دې د دوحې پر ځای په کابل کې ترسره شي. د افغان ولسمشر د ملي امنیت سلاکار حمد الله محب په تازه څرګندونو کې ویلي چې د مذاکراتو دواړه اړخونه دلته د خلکو وضعیت له نږدې لیدلی شي او پر دې پروسه به د ولس باور لا ډېر شي، نو ځکه باید بین الافغاني مذاکرات په افغانستان کې ادامه پیدا کړي. طالبانو په دې اړه غبرګون نه دی ښودلی، خو د سولې د مسایلو څارونکي بیا وایي چې حکومت یوازې د خنډ جوړولو په لټه کې دی.
په رسنیو کې داسې راپورونه خپاره شوي چې په دوحه کې د بین الافغاني مذاکراتو دواړه لوري به خپلې رخصتۍ پيلوي، په داسې حال کې چې ولس د یوه اوربند او جګړو د کمېدو په تمه دی. د طالبانو د قطر دفتر ویاند ډاکټر نعیم په تازه څرګندونو کې ویلي چې بین الافغاني مذاکرات د راتلونکي کال د جنورۍ تر پنځمې نېټې ځنډېدلي دي. له دې سره جوخت افغان حکومت د دې غوښتونکی دی چې د بین الافغاني مذاکراتو پاتې برخې په افغانستان کې پر مخ یوړل شي.
د افغان ولسمشر د ملي امنیت سلاکار حمدالله محب تېره ورځ په خپلو څرګندونو کې ویلي، ښه به وي چې د مذاکراتو پاتې پړاوونه په افغانستان کې مخ ته یوړل شي. د ده په وینا، افغان حکومت د دې وړتیا لري چې وکړی شي د بین الافغاني مذاکراتو لپاره امکانات برابر کړي، ان تاسیسات جوړ کړي او په دې توګه د ډېرو لګښتونو مخه ونیسي. محب دا هم ویلي چې افغان حکومت د ځای په اړه هېڅ راز ملاحظه نه لري، خو د مذاکراتو په برخه کې د اسانتیا په موخه په کور د ننه د مذاکراتو ملاتړ کوي. د ده په خبره: ((د سولې خبرو پاتې پړاوونه باید د هېواد دننه تعقیب شي. دولت د ځای په اړه ځانګړې ملاحظه نه لري او چمتو دی د هېواد هره سيمه چې طالبان پیشنهادوي، هلته د تاسیساتو جوړولو په شمول، بشپړه اماده ګي ونیسي او خبرې پر مخ یوسي)).
نوموړی همدا راز په کور د ننه د مذاکراتو په ترسره کېدو د ولسي نظارت د ډېرېدو خبره کوي. حمدالله محب وایي، که مذاکرات په کور د ننه ترسره کېږي، نو ولس به هر څه په خپله ویني او په دې توګه به یوه ځانګړې امنیتي ساحه رامنځ ته شي چې مذاکرات به لا د ډاډ وړ شي. نوموړی په کور د ننه د مذاکراتو د مخ ته بېولو بل هدف دا یادوي چې وکړی شي په مذاکراتو کې د بهرنیو شرایطو د راتګ پر ځای دغه بهیر په کور د ننه له روان وضعیت متاثر شي. د ده په وینا: ((د افغانانو تر منځ خبرو کې اړینه ده چې را روان پړاوونه یې په افغانستان کې وي، څو سوله د بهرنیو شرایطو پر ځای د افغاني ټولنې له واقعیتونو متاثره، سرتاسري او دایمي وي)).
که څه هم وسله والو طالبانو تر اوسه په دې اړه غبرګون نه دی ښودلی، خو تر دې وړاندې یې ویلي چې په دوحه کې به مذاکرات مخ ته وړي او داسې څرګندونې هم شوې وې چې ګواکي د مذاکراتو بېل پړاوونه به په بېلو هېوادونو کې مخ ته وړل کېږي. بلخوا د سیاسي چارو او سولې د مسایلو شنونکي بیا پر دې باور دي چې افغان حکومت په یو ډول نه په یو ډول د سولې په مسایلو کې خنډ جوړوي. د سیاسي مسایلو شنونکی طارق فرهادي وايي، د ملي امنیت شورا د سلاکار څرګندونې د دوحې د مذاکراتو پر وړاندې د خنډ جوړولو په مانا دي. د ده په خبره: ((د ملي امنیت د سلاکار څرګندونې د دوحې د مذاکراتو په لار کې د ډبرې اچولو په مانا دي. خو دا چاره هله ممکنه ده چې ولسمشر غني له خپلې دندې استعفا ورکړي، انتقالي حکومت جوړ شي او په هغه کې طالبان هم ونډه ولري)).
سیاسي شنونکي دا هم وایي چې د ولسمشر غني نږدې کسان د سولې په برخه کې ځینې ستونزې ان په دوحه کې جوړوي، خو که مذاکرات په کور د ننه کېږي، نو ښایي بیا حکومت ان د امریکا فشارونه هم ونه مني. د سیاسي چارو شنونکی شرف الدین ستانکزی وایي، اوس دواړه لوري دې ته په تمه دي چې د امریکا نوی حکومت د دوی په اړه څه دریځ لري. د ده په خبره: ((اوس دواړه د امریکا نوي حکومت ته په تمه دي، ځکه خو خنډونه او ځنډونه رامنځ ته کېږي)).
طالبان دمګړی په دوحه کې له خپل دفتر د مهمې سیاسي برخې په توګه کار اخلي چې نه یوازې له افغان حکومت سره یې مذاکرات له دې لارې پيل کړي، بلکې د نړۍ له ګڼو هېوادونو سره یې سیاسي مذاکرات او اړیکې له دې لارې تامینيږي.