ینس سټولټنبرګ: ناټو د افغان ځواکونو او سولې ملاتړ ته ژمنه ده

ناټو وایي په افغانستان کې د افغان ځواکونو ملاتړ او د سولې هڅو ته ژمن دي. د ناټو عمومي منشي ینس سټولټنبرګ د ناټو د بهرنیو چارو وزیرانو تر غونډې وروسته په یوه خبري کنفرانس کې ویلي، دوی په افغانستان کې د سولې له هڅو هرکلی کوي خو د افغان ځواکونو روزنې، تجهیز، ملاتړ او تمویل ته ژمن دي. دده په خبره دوی په افغانستان کې د ترهګرو پر ضد د افغان ځواکونو تر څنګ ولاړ دي او په دغه هېواد کې د ناټو حضور هم د وضعیت پر څرنګوالي پورې تړلی دی. سټولټنبرګ وایي ناټو غواړي د خپلو ځواکونو شمېر په افغانستان کې ۱۲ زره ته راښکته کړي، خو بیا یې هم کموالی او ډېروالی د وضعیت پر څرنګوالي پورې تړلی دی. هغه همدا راز د افغان حکومت له لوري د مرکچي پلاوي د اعلان هرکلی کړی دی او پر طالبانو یې غږ کړی چې ژر تر ژره بین الافغاني خبرو ته کېني او په دې توګه په دغه هېواد کې روانه اوږده جګړه ختمه کړي.