روغتیا وزارت: هېواد کې د کرونا وبا ۲۳۴ نورې مثبتې پېښې ثبت شوې

روغتیا وزارت وایي چې په تېرو ۲۴ ساعتونو کې په هېواد کې د کرونا وبا ۲۳۴ نورې مثبتې پېښې ثبت شوې دي، له دې سره پر یادې ناروغۍ د اخته کسانو شمېر ۵۱ زره او ۵۹۴ ته رسېدلی دی. د یاد وزارت په خبره، په همدې موده کې پر کرونا اخته نهه کسه مړه شوي او ۶۶۲ نور بیا بېرته روغ شوي دي. د روغتیا وزارت د وروستیو معلوماتو له مخې، تر اوسه په هېواد کې له کرونا وبا د مړه شویو کسانو ټول شمېر دوه زره او ۱۳۵ ته او د بېرته رغېدلیو هغه بیا ۴۰ زره او ۵۸۲ ته لوړ شوی دی. د یادونې ده چې پرون یاد وزارت د یوې خبرپاڼې په خپرولو سره له هېوادوالو وغوښتل چې د کرونا وبا مخنیوي لپاره دې ګاونډیو هېوادونو ځانګړې توګه ایران او پاکستان ته له تګ راتګه په کلکه ډډه وکړي.