په هېواد کې د نا امنیو له زیاتېدو سره هممهاله، د امنیتي ادارو مسوولین د مشرانو جرګې غونډې ته وربلل شوي وو او د وروستي وضعیت په اړه یې معلومات ورکړي دي. د کورنیو چارو وزیر مسعود اندرابي د خپلو خبرو پر مهال وویل چې طالبانو د سیمو د نیولو وړتیا بایللې، نو اوس هڅه کوي د مقناطیسي ماینونو او هدفي بریدونو له لارې ځان خپلو موخو ته ورسوي. د ملي امنیت د لوی ریاست رییس بیا وایي چې طالبانو روان کال تر دې دمه د اتلس زرو په شاوخوا کې بریدونه کړي دي.
په وروستیو کې د پلازمېنې کابل په ګډون د هېواد په ډېری ولایتونو کې امنیتي وضعیت خورا ترینګلی شوی دی. ځانمرګي بریدونه او هدفي وژنې هغه څه دي چې د خلکو ژوند یې تریخ کړی دی. وړمه ورځ د ولسي جرګې غړو په خپله عمومي غونډه کې د خبرو پر مهال پر امنیتي وضعیت نیوکه وکړه او ټینګار یې وکړ چې امنیتي ادارې د خلکو د امنیت په تامین کې ناکامې دي. له دې سره جوخت مشرانو جرګې د امنیتي ادارو مسوولین وربللي وو.
د کورنیو چارو وزیر مسعود اندرابي مشرانو جرګې ته د خپلو خبرو پر مهال وویل چې طالبان کمزوري شوي دي، له امنیتي ځواکونو نوې سیمې نه شي نیولی، نو د دې لپاره چې د رسنیو پام ځان ته واړوي، په هدفي بریدونو او په ښارونو کې په چاودنو لاس پورې کوي. اندرابي وايي، طالبانو ځکه تاوتریخوالی ډېر کړی چې وکړی شي د مذاکراتو پر مېز لا ډېر امتیازات واخلي. د ده په خبره، په کابل او ولایتونو کې په هدفي بریدونو کې د طالبانو لاس دی او دغه ډله غواړي په دې توګه فشارونه ډېر کړي او د سولې په خبرو کې امتیازات واخلي. هغه د خپلو خبرو په دوام وویل چې طالبانو د دوحې تر هوکړې وروسته د عبیده په نامه ډله جوړه کړې او دغه ډله په ولایتونو، په تېره په کابل کې هدفي بریدونه کوي. هغه وايي: ((د ځینو نیول شوو کسانو له اعترافاتو ښکاري چې طالبانو په لوګر کې د عبیده په نامه نوې ډله جوړه کړې ده. دغه ډله دولتي کارکووونکي، خبریالان او مدني فعالین په نښه کوي. دوی په دې توګه غوغا جوړوي)).
د دې تر څنګ د کورنیو چارو وزیر دا هم وايي چې د بریدونو د مخنیوي لپاره یې د ملي امنیت له لوی ریاست سره په ګډه د یو لړ عملیاتو د ترسره کولو پلان جوړ کړی او په دې کې به د هغو کسانو پر ضد عملیات کوي چې دغه ډول بریدونه ترسره کوي.
د ملي امنیت لوی ریاست رییس هم مشرانو جرګې ته د خپلو کړنو په اړه د وضاحت ورکولو پر مهال وویل چې روان کال تر دې دمه په هېواد کې شاوخوا ۱۸ زره او ۲۰۰ بریدونه شوي چې له دې ډلې د ۹۹ سلنې مسوولین وسله وال طالبان دي. د ده په خبره، دغه ډله لا هم ډول ډول بریدونه ترسره کوي او د سولې تر تړون یې وروسته جګړې او بریدونه ډېر کړي دي. احمد ضیا سراج دغه راز وایي چې روان کال افغان امنیتي ځواکونو لسګونه عملیات ترسره کړي چې په دې لړ کې یې ۶ زره او ۱۰۰ شکمن کسان نیولي چې له دې ډلې ۳ زره او ۶۰۰ یې په ترهګریزو فعالیتونو کې د لاس لرلو په تور نیول شوي دي. سراج همدا راز د هغو کسانو پر وړاندې د ګڼو عملیاتو د ترسره کېدو خبره کوي چې په هدفي بریدونو کې لاس لري. د ده په خبره، په دې بریدونو کې د لاس لرلو په تور ۷۰ کسه نیول شوي دي.
د افغانستان دغه مهم امنیتي بنسټونه داسې مهال په خپلو چارو کې د لاس ته راوړنو خبره کوي، چې په دې وروستیو کې په کابل ښار کې کابو هره ورځ له یوې تر دوو پورې د مقناطیسي ماین چاودنې کېږي. د معلوماتو له مخې، په وروستیو ۱۲ ورځو کې په کابل ښار کې ۱۷ امنیتي پېښې شوي چې له امله یې ۲۴ کسان وژل شوي او ۸۰ نور ټپیان شوي دي. سره له دې چې وسله والو طالبانو په ګڼو وروستیو بریدونو کې لاس لرل رد کړي، خو امنیتي ادارې وايي چې دا د طالبانو کار دی او د فشار رامنځ ته کولو په لټه کې دي.
