د خبریالانو ملاتړ ټولنو غور کې د یو خبریال بسم الله عادل پر وژل کېدو د غبرګون په ترڅ کې له خبریالانو غوښتي دي چې د درېیو ورځو لپاره دې د افغان حکومت له خوا خپاره شوي خبرونه، نه خپروي. د خبریالانو د دفاع کمېټې مشر عبدالمُعید پر نړیوالې ټولنې، ملګرو ملتونو او د بې پولې خبریالانو پر ټولنې غږ کړی چې په افغانستان کې د خبریالانو د هدفي وژنو پر خلاف غږ اوچت کړي. د غور غږ راډیو مسوول او خبریال بسم الله عادل په تېرو دوو میاشتو کې په افغانستان کې پر خبریالانو د هدفي بریدونو پنځم قرباني دی. د بشري حقونو خپلواک کمېسیون د دې وضعیت د دوام له کبله اندېښنه ښودلې. د دې کمېسیون مشرې شهرزاد اکبر تېر ماښام پر خپله ټویټر پاڼه لیکلي، چې ۲۰۲۱ میلادي کال د دوو ملکي فعالانو په ترور پیل شو. د نوموړې په وینا دا هدفي وژنې د دې لپاره کېږي چې د افغانانو روحیه مړه او خپلواک اوازونه غلي شي.
