په دوحه کې د دویم پړاو مذاکراتو مقدماتي ناسته شوې ده

د طالبانو د قطر دفتر ویاند ویلي چې تېر ماښام دواړو مذاکراتي ټیمونو مقدماتي ناسته لرله او ټاکل شوې چې د راتلونکې شنبې په ورځ پر اجنډاوو بحث پیل شي. د افغان حکومت د مذاکراتي پلاوي غړي نادر نادري هم ویلي چې مقدماتي ناسته شوې ده او پر موضوعاتو بحث به د شنبې په ورځ پيلېږي. د طالبانو او افغان حکومت ترمنځ په تېر دور کې درې میاشتې خبرې وشوې چې له مخې یې دواړه لوري د مذاکراتو پر تګلاره هوکړې ته ورسېدل، اجنډا یې نهايي کړه او اوس به پر اجنډا خبرې پیلېږي. د افغان حکومت لومړنۍ غوښتنه اوربند رامنځ ته کول دي.