د کندهار والي وايي طالبانو د سولې له نامه په استفادې جګړې ډېرې کړې دي. د کندهار نوی والي روح الله خانزاده وایي طالبان د کوټې شورا له لارې په کندهار او شاوخوا ولایتونو کې عملیات پلانوي او تر دې دمه د سولې خبرو لپاره دوی خپلې جګړې نه دي کمې کړې. د خانزاده په وینا دوی د سولې خبرو ته خوشاله دي او ملاتړ یې کوي خو تر څنګ یې دغه ډول بریدونه او تاوتریخوالی هم دوی ته د منلو نه دی. نوموړي ټینګار کړی چې په کندهار کې یې په امنیتي او دفاعي برخه کې پراخ بدلونونه راوستلي دي او هڅه کوي ددغه ولایت امنیت بېرته تامین کړي او سقوط شوې پوستې له سره فعالې کړي. کندهار د هېواد هغه ولایت دی چې په وروستیو اونیو کې د طالبانو او افغان حکومت تر منځ د سختو جګړو شاهد و.
