بشري حقونه: په درېو ورځو کې ۴۴ ملکي وګړو ته مرګ ژوبله اوښتې

د بشري حقونو خپلواک کمېسیون وايي، د مرغومې میاشتې له ۲۹ مې نېټې څخه بیا د سلواغې میاشتې تر لومړۍ پورې ۸ ملکي وګړي وژل شوي او ۳۶ تنه نور ټپيان شوي دي. یاد کمېسیون وايي، د دوی د معلوماتو له مخې یادو ملکي وګړو ته دغه مرګ ژوبله په پنځو ولایتونو کې د چسپکي ماینونو، هدفي بریدونو او هاوان لګېدو له امله اوښتې ده. د بشري حقونو کمېسیون د ملکي وګړو خوندیتوب په هدف پر ښکېلو لورو غږ کړی چې بشر دوستانه نړیوال حقوق رعایت کړي او یوځل بیا یې د ژر تر ژره د تاوتریخوالي کمېدو او اوربند ټینګېدو غوښتنه کړې ده. تر دا مهاله افغان چارواکو او وسله والو طالبانو په دې اړه څه نه دي ویلي.