ملي دفاع وزارت: طالبانو پر ژمنو عمل نه دی کړی، ښايي بهرنیان و نه وځي

بهرني ځواکونه به د افغانستان شرایطو ته په کتو د خپل حضور یا وتلو په اړه پرېکړه کوي. د افغانستان د ملي دفاع وزارت مرستیال شامحمود میاخیل په خپله یوه مرکه کې ویلي طالبانو پر خپلو ژمنو هېڅ راز عمل نه دی کړی. دده په وینا دغه ډلې نه تاوتریخوالی کم کړی دی، نه اوربند ته تیار شوي دي او نه یې هم په مذاکراتو کې پرمختګ ته لار هواره کړې ده. میاخیل وایي همدې مسایلو ته په کتو ښایي طالبان ددې لامل شي چې په هېواد کې د بهرنیو سرتېرو حضور دوام وکړي. دده په خبره بهرني ځواکونه تل وایي چې شرایطو ته په پام به په افغانستان کې د خپل حضور یا وتلو په اړه پرېکړه کوي نو ظاهرا داسې ښکاري چې شرایط د بهرنیانو وتلو ته برابر نه دي.