کورنیو چارو وزارت وايي چې د وردګو د بهسودو ولسوالۍ د پېښې له امله یې د دغه ولایت د امنیه قوماندان دنده ځنډولې او لویې څارنوالی ته یې ور پېژندلی دی. دا کار له هغه وروسته کېږي چې یو دولتي پلاوی بهسودو ولسوالۍ ته ولاړ او هلته یې دا پېښه وڅېړله. پخوا کورنیو چارو وزارت ویلي وو چې د عليپور وسله والو کسانو د لاریون له منځه پر امنیتي ځواکونو ډزې کړې وې، چې په پایله کې یې دا پېښه رامنځ ته شوې او وژل شوي هم تر ډېره د عليپور وسله وال کسان دي.
هغه وخت داسې تصویرونه هم خپاره شوي وو چې په لاریون کې وسله وال کسان دي، خو اوس حکومتي دریځ یو مخ بدلېږي. اصلي کیسه دا وه چې د وردګو د بهسودو په دوو ولسوالیو کې د عليپور سلګونه وسله وال فعال دي او هلته تل د ولسوال او امنیه قوماندان په چارو کې لاسوهنه کوي. تر پېښې وړاندې عليپور د بهسودو د ولسوال دفتر تړلی و او د ولسوالۍ له امنیتي ځواکونو یې هم یو هاموې ټانګ، یوه رنجر او وسلې په زور اخیستې وې. د وردګو امنیه قومندان د ځانګړو ځواکونو په مشرۍ د امنیت شورا په امر بهسودو ته ولاړ چې هم نوي امنیه قومندانان معرفي کړي او هم له علیپور څخه بېرته دولتي تجهیزات واخلي، خو علیپور سیمه ییز خلک تحریک کړل، خپل وسله وال یې هم په لاریون کې ګډ کړل، وروسته یې پر امنیتي ځواکونو ډزې وکړې او په پایله کې یې ۱۱ کسان ووژل شول او ۳۱ نور ټپیان شول. کله چې پېښې ته قومي او سیاسي رنګ ورکړل شو، حکومت د پلټنو خبره وکړه، خو د پلټنو په پایله کې د دې پر ځای چې د ناقانونه وسله والو ډلو یو جنایتکاره قومندان علیپور ملامت شي، ونیول شي او محاکمه شي، د وردګو امنیه قوماندان پړ وګڼل شو، دنده یې وځنډول شوه او څارنوالۍ ته معرفي شو چې ښايي زندان ته هم ولاړ شي.
په دې پېښه کې ښکاري چې ارګ په واضح ډول سیاسي چلند وکړ. د دې لپاره چې ارګ خپل ځینې سیاسي ملاتړي له لاسه ور نه کړي او د ولسمشرۍ دویم مرستیال خپه نه کړي، خپل زړور او مسلکي جنرال یې قرباني کړ. له امنیتي منسوبینو سره د ارګ دا ډول چلند نوی نه دی؛ پخوا یې هم په ځلونو همداسې کړي دي. څو کاله وړاندې هم پر یو بل همداسې جنایتکار، نظام الدین قیصاري دوه ځله عملیات وشول، چې پکې د ځانګړو ځواکونو څو سرتېري هم ووژل شول، وروسته د سیاسي معاملو له مخې نه یوازې قیصاري ازاد شو، بلکې دولتي امتیازات ورکړل شول او اوس هم همغسې امتیازات ورکول کېږي.
اشرف غني او ملګري یې د خپل واک د تدوام لپاره په هر ډول ارزښتونو او ملي ګټو معامله کوي. دوی د دې لپاره چې په هزاره وګړو کې سیاسي ملاتړ له لاسه ور نه کړي، نو خپل امنیتي ځواکونه قرباني کوي. دا ډول پېښې به ښايي په لنډمهال کې اشرف غني ته ګټه وکړي، خو پایلې یې خطرناکې دي، ځکه چې ورو ورو به دا امنیتي ځواکونه پر خپلو مشرانو او اعلی سرقومندان لا زیات بې باوره شي او بیا به سیاسي معاملې د امنیتي ځواکونو له ملاتړ پرته د ارګ واکمنان ونه شي ساتلی.