د سولې مذاکراتي ټيمونو تر اوږده ځنډ وروسته یو ځل بیا په قطر کې د خپلمنځي ناستو د پیلېدو خبر ورکړی دی. دواړو لورو وړم ماښام په یوې ګډې اعلامیې کې ویلي چې یاده ناسته د دواړو پلاوو د مشرانو او ځینو غړیو ترمنځ په ښه فضا کې تر سره شوه. د افغانستان د اسلامي جمهوریت مذاکراتي پلاوي او په قطر کې د طالبانو د سیاسي دفتر ویاند ډاکتر محمد نعیم هم د دې ناستې ترسره کېدل تایید کړي او ویلي یې دي چې د دواړو خواوو تر منځ یاده ناسته په ښه فضا کې ترسره شوه. دوی دغه راز ویلي چې په یاده ناسته کې ټاکل شوو کاري ګروپونو ته دنده سپارل شوې، چې په دې اړه خپلو ناستو ته دوام ورکړي.
د سولې په اړه د بین الافغاني مذاکراتو دویم پړاو د تېرې جنورۍ په نهمه په دوحه کې پرانیستل شو، خو وروسته د دواړو پلاوو ترمنځ د کاري اجنډا پر سر د ځینو اختلافاتو له امله ناستې تر سره نه شوې.
له اوږدې مودې د سولې خبرې په ساړه حالت کې وې. د تېر میلادي کال په وروستیو کې یوه میاشت رخصتي وشوه، خو چې کله خبرې د جنورۍ په اوومه بېرته پیل شوې، له دوو سړو ناستو وروسته بیا خبرې یو مخ بندې شولې. داسې ښکارېدله چې په دوحه کې د بین الافغاني خبرو دوسیه نوره تړل شوې او دا خبره به بیا پیل نه شي او که پیل هم شي، نو نتیجه به ونه لري. اوس چې دا خبرې بیا پیل شوي، یو ښه پرمختګ دی او خلک ورته خوشاله دي، خو له ټولو سره بیا هم دا پوښتنه ده چې خبرې به مثبته پایله ولري او که به د پخوا په شان سړې، لانجمنې او بې پایلې وي.
دوه بنسټیز لاملونه شته چې د سولې په خبرو منفي اغېز پرې باسي. یو دا چې لا هم د بهرنیو ځواکونو د وتلو مسأله روښانه نه ده. ناټو او امریکایان تر مې میاشتې د وتلو خبره نه کوي، په داسې حال کې چې د دوحې په هوکړه کې ویل شوي چې باید تر مې ټول بهرني ځواکونه له افغانستان څخه ووځي. که بهرني ځواکونه رښتیا هم ونه وځي او یا په دې اړه له طالبانو سره کوم نوی تفاهم ونه شي، نو تر سولې د جګړې وېره زیاته ده. دا چاره به نه یوازې د امریکا او طالبانو ترمنځ هوکړې ته زیان ورسوي، بلکې د بین الافغاني خبرو ټغر به هم ور ټول کړي. دویم لامل دا دی چې لا هم دواړه بین الافغاني لوري له یو بل سره رښتیني نه دي، په نیتونو کې یې ستونزې شته او هغسې څه نه کوي چې د سولې لپاره ورته اړتیا ده. دا چاره مخامخ پر خبرو منفي اغېز کوي.
اوس چې د سولې خبرې یو ځل بیا پیل شوي، له ټولو ستونزو سره سره ورته هیلې شته. د جګړې دواړه غاړې باید پر دې ولس رحم وکړي، له تېرو زدهکړه وکړي، د ولس غږ واوري او د سولې په برخه کې رښتیني ګامونه واخلي. له انعطاف، قربانۍ او یو بل ته له تېرېدنې پرته نه سوله راتلای شي او نه هم جګړه ختمېدای شي. له همدې امله دواړه لوري باید ټول هغه ګامونه واخلي چې له سولې سره مرسته کوي او ټولې هغه کړنې باید ودروي چې سوله تخریبوي او جګړه زیاتوي.