د ملګرو ملتونو عمومي منشي انتونیو ګوتریش ویلي چې په افغانستان کې روان تاوتریخوالی نور د منلو نه دی. نوموړي د دغه سازمان امنیت شورا ته د افغانستان په اړه د یو راپور وړاندې کولو پر مهال په دغه هېواد کې د تاوتریخوالي پر ژر تر ژره پای ته رسېدو ټینګار کړی دی. ګوتریش زیاته کړې، چې په دغه هېواد کې د سولې پر پروسې د خلکو د له منځه تللي باور لپاره هم باید تاوتریخوالی ودرول شي. هغه ویلي چې په ۲۰۲۰ میلادي کال کې په افغانستان کې امنیتي وضعیت لا ترینګلی شوی دی او په همدې موده کې په دغه هېواد کې د ملګرو ملتونو سازمان ۲۵ زره او ۱۸۰ امنیتي پېښې ثبت کړې دي.
