د افغان امنیتي ادارو د مشرانو تر خبري کنفرانس یوه ورځ وروسته طالبانو خپلو وسله والو ته سپارښتنه کړې، چې د جګړو د شدت په صورت کې د بریدونو صلاحیت لري. طالبانو په یوه خپره کړې اعلامیه کې د جګړو د شدت پړه پر افغان حکومت اچولې او وایي چې حکومتي ځواکونو د دوی تر نفوذ لاندې سیمو کې هوایي او ځمکني عملیات شدید کړي، چې دا د سولې له هوکړې ښکاره سرغړونه ده او په وینا یې، که وضعیت دوام وکړي، نو دوی به غبرګون وښيي. تر دې وړاندې بیا افغان چارواکو ویلي وو چې طالبان لا هم د جګړو له لارې واک ته رسېدل غواړي او تګلاره یې نه ده بدله کړې.
سره له دې چې په راتلونکو اونیو کې په ترکیه کې د افغان حکومت او طالبانو ترمنځ د مخامخ خبرو د پیلېدو په تړاو راپورونه خپرېږي، خو دلته افغان امنیتي او دفاعي ادارې او طالبان یو بل ته ګوتڅنډنه کوي او یو بل د جګړو او عملیاتو په شدت ګواښي. وړمه ورځ د ولسمشر غني د ملي امنیت سلاکار او د افغان امنیتي او دفاعي ادارو مشرانو په یوه خبري غونډه کې د خبرو پر مهال وویل چې دوی به طالبانو ته اجازه ور نه کړي، څو د جګړو له لارې بریا ته ورسېږي. د حمدالله محب په خبره، طالبان هڅه کوي چې د جګړو له لارې واک خپل کړي او په وینا یې، دغه ډله لا هم د سولې ملاتړې نه ده او د جګړې تګلاره یې نه ده بدله کړې. نوموړي زیاته کړه چې یوازې د ټاکنو له لارې به واک راتلونکي ولسمشر ته وسپارل شي.
بلخوا د امنیتي او دفاعي ادارو مشرانو هم وویل چې دوی د طالبانو هر ډول برید ته ځواب وایي او په خبره یې، د دغه ډلې پر ضد به یې عملیات دوام کوي. د کورنیو چارو سرپرست وزیر حیات الله حیات بیا د خپلو خبرو په دوام دا هم وویل چې طالبان په لویو ښارونو کې د بریدونو پلان لري او په خبره یې، دغه ډله هڅه کوي جګړې شدیدې کړي. حیات زیاته کړه چې افغان ځواکونه بیا د هر ډول احتمالي خطر پر وړاندې مبارزې ته تیار دي.
طالبانو بیا پرون ادعا کړې، چې افغان حکومت د دوی پر وړاندې چاڼیز، ځمکني او هوایي عملیات پيل کړي دي. د طالبانو له لوري په یوه خپره شوې اعلامیه کې راغلي چې افغان حکومت او له دوی سره مل بهرني ځواکونه د هېواد په ګوټ ګوټ کې په هغو سیمو کې عملیات کوي، چې د طالبانو تر نفوذ لاندې دي او په خبره یې، دا کار د سولې له هوکړې ښکاره سرغړونه دی. وسله وال طالبان وایي چې د افغان حکومت په هوايي او ځمکنیو عملیاتو کې په ګڼو ولایتونو کې ملکي وګړو ته مرګ ژوبله اوښتې او په خبره یې، که وضعیت همداسې دوام وکړي، نو ښایي دوی به هم خپلې جګړې شدیدې کړي.
د وسله والو طالبانو په اعلامیه کې راغلي، چې په خوست، ننګرهار، بدخشان او هلمند ولایتونو کې د بهرنیو ځواکونو هوایي بریدونه د دوحې له هوکړې ښکاره سرغړونه ده. سرچینې دغه راز پر خپلو وسله والو غږ کړی، چې که عملیات و نه درول شي، نو د خپل ځان د دفاع لپاره هر ډول چې مناسبه بولي، اقدام وکړي. په اعلامیه کې راځي: «که دغه ډول عملیات متوقف نه شي، نو وسله والو ته سپارښتنه کېږي، هر ډول چې مناسب بولي، د ځان او خلکو د دفاع لپاره اقدام وکړي».
افغان حکومت او طالبان داسې مهال یو بل ته د جګړو د شدت او د یو بل پر ضد د اقداماتو د ترسره کېدو خبره کوي چې په استانبول کې د راتلونکي کنفرانس لپاره تیاری روان دی. بلخوا په هېواد کې د ننه جګړې شدیدې شوي چې د افغانانو ژوند یې تریخ کړی دی، خو د دې ټولو تر څنګ د افغانانو ستره هیله دا ده چې ښکېلې خواوې به د ترکیې په کنفرانس کې یوې پایلې ته ورسېږي او په دې توګه به دلته روانه خونړۍ جګړه پای ومومي.