مستقبل د لوړو زده کړو موسسه چې په کابل ښار کې موقعیت لري، په ۱۳۹۳ کال کې یې له لوړو زده کړو وزارت څخه په ۸۶مه ګڼه باندې د فعالیت جواز تر لاسه کړی دی. د یادې موسسې د علمي مرستیال، نجیب الله نصرت په وینا، دوی د پیل پر مهال دوه پوهنځي، انجنیري او حقوق او سیاسي علوم درلودل چې انجنیري پوهنځی یې د سېول یا ساختمان او مهنډسۍ ډېپارټمنټونه او حقوقو او سیاسي علومو پوهنځی یې د ادارې او ډېپلوماسۍ او قضا او څارنوالۍ ډېپارټمنټونه لري. د نوموړي په وینا، د مستقبل د لوړو زده کړو موسسې د استادانو او مسوولینو د هڅو په پایله کې دوی د شرعیاتو پوهنځی هم د خپلو پوهنځیو په لېست کې ور زیات کړ، چې یاد پوهنځی هم دوه ډېپارټمنټونه، فقه او قانون او اسلامي تعلیمات لري. یانې اوسمهال مستقبل د لوړو زده کړو موسسه د دریو پوهنځیو او شپږو ډېپارټمنټونو په چوکاټ کې خپلې درسي چارې پر مخ بیایي.
د ښاغلي نصرت په وینا، مستقبل د لوړو زده کړو موسسه اوسمهال ټولټال ۱۶۰۰ محصلین لري چې په دې ډله کې ۳۰۰ ښځینه محصلینې او پاتې نور یې هلکان تشکیلوي، چې د یادې موسسې په دریو پوهنځيو کې پر لوړو زده کړو بوخت دي.
ښاغلی نصرت وايي، دوی تر دې دمه له خپلو دریو پوهنځیو څخه په پنځو دورو کې شاوخوا ۷۷۵ محصلین فارغ او ټولنې ته یې د خدمت په موخه وړاندې کړي دي.
د مستقبل د لوړو زده کړو موسسې علمي مرستیال نجیب الله نصرت همدا راز وویل، دوی په خپلو دریو پوهنځیو کې د مختلفې علمي کچې لرونکي استادان لري چې ځینې یې د دوکتورا، ځینې یې د ماسټرۍ او ځینې یې هم د لسانس تر کچې لوړې زده کړې لري. د نوموړي په خبره، د دوکتورا لرونکي استادان یې په شرعیاتو پوهنځي کې نسبت نورو پوهنځيو ته زیات دي، همدا راز په حقوقو او انجنیري پوهنځيو کې هم د دوکتورا په کچه د لوړو زده کړو لرونکي استادان لري او پاتې نور یې د ماسټرۍ او لسانس تر کچو لوړې زده کړې لري.
ښاغلي نصرت همدا راز زیاته کړه، دوی په هېواد کې د ننه او له هېواده د باندې له ځینو پوهنتونونو سره علمي او اکاډمیکې اړیکې لري، داسې چې له هېواده د باندې د ترکیې هېواد له ځينو پوهنتونونو سره متقابلې او علمي اړیکې لري او همدا راز تمه ده چې د نورو ګاونډیو هېوادونو له پوهنتونونو سره هم د علمي متقابلو اړیکو او همکاریو تفاهم لیکونه لاسلیک کړي او په هېواد کې د ننه هم له ځینو دولتي او خصوصي پوهنتونونو سره نږدې علمي اړیکې او تفاهم لیکونه لري، چې پر بنسټ یې یو له بل سره علمي تجربې او سلا مشورې شریکوي.
د ښاغلي نجیب الله نصرت په وینا، دوی د مستقبل په لوړو زده کړو موسسه کې د محصلینو لپاره مجهز کتابتون لري، چې شاوخوا ۵۰۰۰ جلده کتابونه لري چې محصلین کولای شي خپل د اړتیا وړ مالومات ترې تر لاسه کړي. نوموړي همدا راز وویل، پر یاد کتابتون سربېره دوی د الکترونیکي کتابتون اسانتیا هم رامنځته کړې ده، چې ډېر کتابونه پکې شته او محصلین ترې وخت ناوخت د مطالعې لپاره ګټه اخلي.
ښاغلی نصرت وايي چې دوی د خپلو محصلینو لپاره ځینې نورې اسانتیاوې هم لري چې له هغې ډلې یې د ښځینه محصلینو لپاره ترانسپورټ، نارینه او ښځینه دواړو محصلینو ته د ګروپي مطالعې په موخه بېل او پرمختللی سیستم، د محصلینو لپاره د علمي زده کړو په موخه ځانګړو پروګرامونو او ورته نورو امکاناتو ته اشاره کولای شو.
د مستقبل د لوړو زده کړو موسسې یاد مسوول زیاته کړه، دوی د خپلو محصلینو لپاره ځانګړی تخفیف په پام کې نیولی دی. هغه محصلین چې مالي او اقتصادي ستونزې ولري، د یادې موسسې د ادارې لخوا ځانګړی تخفیف ورکول کېږي. د نوموړي په وینا، پر یاد تخفیف سربېره دوی له ځینو ادارو لکه د ځوانانو معینیت، مدني ټولنو او ورته نورو ارګانونو سره د متقابلو مرستو تفاهم لیکونه لاسلیک کړي دي، چې پر بنسټ یې بېوزله او مالي ستونزې لرونکي محصلین دوی ته ورپېژندل کېږي او دوی ورته په تحصیلي فیس کې ځانګړی تخفیف ورکوي.
د ښاغلي نصرت په وینا، دوی خپلو فارغ شوو محصلینو ته په لوړو زده کړو وزارت کې ثبت او راجستر شوي اسناد ورکړي دي. نوموړی زیاتوي چې د مستقبل د لوړو زده کړو موسسې اداره په یاده برخه کې پر وخت کوټلي ګامونه اخلي او د محصلینو له فراغت سره سم ورته تحصیلي اسناد چمتو کوي او دوی ته یې د لا ډېرې ګټې اخیستو په موخه سپاري.
ښاغلي نصرت وویل، دوی د دولتي او خصوصي پوهنتونونو تر منځ کوم ځانګړی توپیر نه ویني، یوازې دومره ده چې د دولتي پوهنتونونو او علمي مرکزونو مالي ملاتړ د دولت لخوا کېږي، خو ښوونیز نصاب د دواړو دولتي او خصوصي پوهنتونونو لپاره د لوړو زده کړو وزارت له لایحې او قوانینو سره سم ترتیبېږي او د تدریس لارښوونه یې کېږي.
د مستقبل د لوړو زده کړو موسسې علمي مرستیال ښاغلي نجیب الله نصرت وویل، دوی د ورځې په دریو درسي ټایمونو کې خپل محصلین د زده کړو لپاره را غواړي چې یوه یې سهارنۍ، بله یې له غرمې وروسته او درېیمه یې هم ماښامنۍ دوره ده.
ښاغلی نصرت زیاتوي چې دوی د موسسې د لا بډاینې لپاره په نږدې راتلونکي کې ځینې پلانونه لري، چې تمه لري د تضمین کیفیت او اعتبار ورکړې پروسو له بشپړولو وروسته به یې پلي کړي. له دې ډلې کولای شو د ماسټرۍ پروګرام رامنځته کولو، د موسسې موقعیت، امکاناتو او شرایطو ته په کتو د اقتصاد، کمپیوټر ساینس او معالجوي طب په ګډون، د نوو پوهنځيو رامنځته کولو او ورته نورو پروګرامونو ته اشاره وکړو.
په پای کې ښاغلي نجیب الله نصرت وویل، د مستقبل د لوړو زده کړو موسسې اداري هیئت او مسوولین له دولت او په ځانګړې توګه له لوړو زده کړو وزارت څخه غواړي چې د خصوصي پوهنتونونو او لوړ زده کړو موسسو لپاره په ترتیب شوو لایحو، مقرراتو او تګلارو کې اسانتیاوې رامنځته کړي، د یادو موسسو او پوهنتونونو ستونزو ته رسیدګي وکړي، دا چې یاد مرکزونه له دولت سره همکار او همغږي دي؛ نو باید لا ډېره پاملرنه ورته وشي او په یادو برخو کې یې تر منځ انډول په پام کې ونیول شي. د نوموړي په وینا، له دولت څخه هم غواړي چې خصوصي سکتور په ځانګړې توګه علمي او اکاډمیکې برخې ته لا ډېره پاملرنه وکړي.