د طالبانو لیک؛ له سیاسي څېرو یې د مستقیمو مذاکراتو غوښتنه کړې ده

طالبانو ځینو افغان سیاسي څېرو ته د مستقیمو مذاکراتو په موخه لیکونه استولي دي. رسنیو ته باوري سرچینو ویلي طالبانو غوښتي په انفرادي توګه له ځینو سیاسي څېرو سره لیده کاته ولري چې له همدې امله یې دوی ته لیکونه استولي او له دوی یې د مذاکراتو غوښتنه کړې ده. په دې ډله کې یو هم د ملي مصالحې عالي شورا رییس ډاکټر عبدالله عبدالله دی چې د طالبانو لیک ورته رسېدلی دی. د نوموړي ویاند فریدون خوځون د لیک رسېدل تایید کړي خو وایي له طالبانو سره د سیاسي څېرو انفرادي مذاکرات د هېواد په ګټه نه دي. دده په خبره طالبان په دې توګه غواړي د جمهوریت په لیکه کې درځ راپیدا کړي او د افغان حکومت د مذاکراتي ډلې موقف کمزوری کړي. د حکومت ځینو نورو چارواکو هم په څرګندونو کې دا د نفاق راوستو لپاره د طالبانو هڅه بللې ده.