خانه دانش د لوړو زده کړو موسسه چې په تخار ولایت کې موقعیت لري، په ۱۳۹۰ کال کې یې له انسټېټیوټ څخه د لوړو زده کړو موسسې ته ارتقاع وکړه. د یادې موسسې د علمي معاون ښاغلي عبدالواحد حماد په وینا، خانه دانش د لوړو زده کړو موسسې د پیل پر مهال یوازې د اقتصاد پوهنځی درلود چې د څلورو ډېپارټمنټونو په چوکاټ کې یې درسي چارې پر مخ بېولې، خو په ۱۳۹۳ کال کې یې له لوړو زده کړو وزارت څخه د حقوقو او سیاسي علومو پوهنځي جواز هم تر لاسه کړ، چې اوسمهال دغه موسسه د دوو پوهنځیو او شپږو ډېپارټمنټونو په درلودو سره فعالیت کوي.
ښاغلي حماد وویل، دوی په حقوقو او سیاسي علومو پوهنځي کې دوه ډېپارټمنټونه، قضا او څارنوالي او اداره او ډيپلوماسي، او په اقتصاد پوهنځي کې هم څلور ډېپارټمنټونه لري چې محصلین پکې پر لوړو زده کړو بوخت دي.
د ښاغلي حماد په وینا، خانه دانش د لوړو زده کړو موسسه د زرو په شاوخوا کې محصلین لري چې له دې ډلې يې ۳۵ سلنه ښځينه محصلینې او پاتې نور یې هلکان تشکیلوي.
ښاغلي حماد زیاته کړه، دوی په خانه دانش د لوړو زده کړو موسسه کې د ماسټرۍ پروګرام درلود، خو د کرونا ناروغۍ د ګواښونو له امله یې چارې وځنډېدې، له همدې امله یې د ایران هېواد له یوه پوهنتون سره د تفاهم لیک پر بنسټ د دغه پروګرام چارې یاد پوهنتون ته وسپارلې. د ښاغلي حماد په وینا، تمه ده چې د کرونا ناروغۍ په له منځه تلو سره به یو ځل بیا د خانه دانش په لوړو زده کړو موسسه کې د ماسټرۍ پروګرام پيل شي.
د خانه دانش د لوړو زده کړو موسسې علمي معاون همدا راز وویل، دوی تر دې دمه له خپلو دواړو پوهنځیو څخه په پنځو دورو کې تر ۲۸۰ پورې محصلین فارغ او ټولنې ته یې د خدمت په موخه وړاندې کړي دي.
ښاغلي حماد وویل، دوی هر کال په مختلفه کچه نوي محصلین جذب کړي دي، داسې چې په ۱۳۹۷ کال کې یې ۳۰۰ تنه، په ۱۳۹۸ کال کې یې ۴۲۳ تنه او په ۱۳۹۹ کال کې یې تر ۳۸۰ تنو پورې نوي محصلین جذب کړي او د لوړو زده کړو امکانات یې ورته برابر کړي دي.
د خانه دانش د لوړو زده کړو موسسې یاد مسوول زیاته کړه، دوی خپلو محصلینو ته د هر سمیستر په فیس کې تر ۵۰ سلنه پورې تخفیف ورکوي. د نوموړي په وینا، د دوی د هر پوهنځي سمیستر وار فیس په لوړو زده کړو وزارت کې ۱۵۰۰۰ افغانۍ ثبت شوی دی، خو دوی د خپل ځانګړي تخفیف په پام کې نیولو سره له محصلینو څخه هر سمیستر ۸۰۰۰ افغانۍ اخلي.
ښاغلي حماد همدا راز وویل، دوی له هغو محصلینو څخه چې اقتصادي وضعیت یې ښه نه وي او یا له مالي ستونزو سره لاس او ګرېوان وي، هېڅ ډول فیس نه اخلي او په وړیا توګه ورته د لوړو زده کړو اسانتیاوې برابروي.
ښاغلي عبدالواحد حماد وویل، دوی د ورځې په دوو ټایمونو کې خپلې درسي چارې پر مخ بیایي، چې یوه یې سهارنۍ دوره ده او بله یې هم ماښامنۍ دوره.
ښاغلي حماد زیاته کړه، دوی په خانه دانش د لوړو زده کړو موسسه کې ټول ۴۳ استادان لري، چې له دې ډلې یې ۲۱ د ماسټرۍ تر کچې لوړې زده کړې لري او پاتې نور یې لسانس دي.
د ښاغلي حماد په وینا، دوی د خپلو محصلینو لپاره د پوهنتون په سطحه لوی کتابتون لري چې شاوخوا شل زره جلده مختلف کتابونه پکې شته او پر دې سربېره هر پوهنځی خپل ځانګړی کتابتون هم لري، چې د مسلک اړوند کتابونه پکې موجود دي او محصلین کولای شي خپل د اړتیا وړ مالومات ترې تر لاسه کړي او وخت ناوخت مطالعه پکې وکړي.
ښاغلي حماد وویل، دوی د هېواد د ننه له ځینو پوهنتونونو سره علمي اړیکې لري، چې د یادې موخې لپاره یې د تخار او بدخشان پوهنتونونو اتحادیه رامنځته کړې ده او پر دې سربېره په تخار ولایت کې د لوړو زده کړو څلورو د خصوصي موسسو اتحادیه لري، چې په هغوی کې پیمان، راه سعادت، خانه دانش او یوه بله د لوړو زده کړو خصوصي موسسه غړیتوب لري او له همدې لارې یو له بل سره د اکاډمیکو اړیکو پر بنسټ خپلې علمي تجربې شریکوي.
ښاغلي عبدالواحد حماد زیاته کړه، دا چې د لوړو زده کړو خصوصي موسسو ته تر دې دمه د فارغو محصلینو ډيپلومونه نه دي ورکړل شوي، نو دوی هم خپلو فارغو محصلینو ته په لوړو زده کړو وزارت کې ثبت او راجستر شوي ترانسکرېپټونه ورکوي څو محصلین وکولای شي چې له حقوقو یې ګټه واخلي.
ښاغلي حماد وویل، دوی د خپلو محصلینو د علمي سویې د لوړاوي په موخه ډېر امکانات لري، د بېلګې په توګه، وړیا انټرنېټ کلپ، کمپیوټر لب، ښوونیز سمینارونه، ورکشاپونه، د اقتصاد پوهنځي د محصلینو لپاره د عملي کار پروګرامونه، دولتي قضایي ادارو ته د عملي کار او تمثیلي محکمو د دایرولو په موخه د حقوقو او سیاسي علومو پوهنځي د محصلینو لېږل او داسې نورې هغه اسانتیاوې دي، چې خانه دانش د لوړو زده کړو موسسه یې د خپلو محصلینو د علمي سویې د لا بډاینې په موخه تر سره کوي.
ښاغلي حماد زیاته کړه، دوی د موسسې د لا پرمختګ او ښه والي په موخه پنځه کلن ستراتیژیک پلان چمتو کړی، چې له ۱۳۹۹ کال څخه تر ۱۴۰۳ کال پورې د پلي کېدو وړ دی، چې د یاد پلان په ترڅ کې به له ټولو نړیوالو سټنډرډونو څخه ګټه واخلي او د پوهنځيو، کتابتون، د محصلینو د علمي سویې د لوړولو او د تضمین کیفیت مرحلو پوره کولو ته به ځانګړې پاملرنه وشي او د موسسې د لا بډاینې په موخه به یې عملي کړي.
ښاغلي حماد په خپلو خبرو کې وویل، دوی له لوړو زده کړو وزارت څخه غوښتنه کوي څو د لوړو زده کړو د خصوصي موسسو چارو ته د رسېدو په برخه کې لا ډېرې اسانتیاوې رامنځته کړي. د نوموړي په وینا، دا چې په هېواد کې د لوړو زده کړو د خصوصي موسسو شمېر زیات دی، خو په لوړو زده کړو وزارت کې یې د اړوندو چارو د پر مخ بېولو لپاره یوازې پنځه ویشت کار کوونکي پر دنده ګمارل شوي دي، چې همدا د لوړو زده کړو موسسو د چارو د نه پرمختګ او ځنډ لوی لامل دی. نوموړي له لوړو زده کړو وزارت څخه هیله وکړه څو د لوړو زده کړو د خصوصي موسسو د معینیت په چوکاټ کې یوه اداره رامنځته کړي، څو وکولای شي چې د یادو موسسو اړوندو چارو ته په وخت رسیدګي وکړي او ستونزې یې حل شي. نوموړي همدا راز زیاته کړه، دا چې خصوصي موسسې د دولت یوه مرستندویه برخه ده، نو له دولت څخه غواړي څو یادو موسسو ته لا ډېره پاملرنه وکړي، توپيرونه په پام کې ونه نیسي او اړوندو چارو ته یې پر وخت رسیدګي وکړي.
