امریکایي نظامیان: وروستیو کې مو لښکرګاه کې پر طالبانو هوایي بریدونه کړي دي

امریکا وایي د سرتېرو له وتلو سره یې هممهاله پر طالبانو هوایي بریدونه هم کړي دي. د امریکایي پوځ یوې سرچینې د نامه نه ښودو په شرط رسنیو ته ویلي چې دوی په وروستیو ورځو کې د افغان پوځ په ملاتړ په لښکرګاه ښار کې پر طالبانو ګڼ هوايي بریدونه کړي دي. سرچینه کاږي دوی له وتلو سره هممهاله د اړتیا په صورت کې د افغان پوځ په ملاتړ بریدونو ته ادامه ورکوي. د پنټاګون ویاند جان کربي ددې خبر په اړه څه نه دي ویلي خو وایي چې له افغان ځواکونو یې ملاتړ دوام کوي. دده په خبره دوی له افغان پوځ خپل ملاتړ ته ژمن دي او همکارۍ به دوام کوي. دا څرګندونې داسې مهال کېږي چې طالبانو په وروستیو ورځو کې په ګڼو ولایتونو کې خپل بریدونه ډېر کړي دي.