د بهرنیو ځواکونو د وتلو له پرېکړې سره هممهاله له افغانستانه ځينو ډيپلوماتیکو ادارو هم د وتلو نیت کړی دی. تازه استرالیا ویلي چې په افغانستان کې به خپل سفارت د لنډې مودې لپاره تړي او لامل یې هم امنیتي مسایل یاد کړي دي. بلخوا افغان حکومت بیا ویلي، چې دوی د ډيپلوماتیکو دفترونو او کارکوونکو د امنیت تامین ته ژمن دي او په دې برخه کې د ملګرو هېوادونو اندېښنې بېځایه دي. وسله والو طالبانو هم ډاډ ورکړی چې بهرنيو ډيپلوماتانو او مرستندویه موسسو ته به ګواښ نه جوړوي.
وروسته له هغه چې له افغانستان د بهرنیو ځواکونو د وتلو پروسه پيل شوه، ورسره جوخت ځينو بهرنیو موسسو او سفارتونو ته هم اندېښنې پیدا شوې. د دوحې د هوکړې پر بنسټ امریکايي او د ناټو نور ځواکونه باید له افغانستان ووځي چې په دې ډله کې استرالیا هم د خپلو سرتېرو د ایستلو لړۍ پيل کړې ده. لا هم استراليايي عسکر په بشپړه توګه له افغانستانه نه دي وتلي، خو استرالیا وایي چې د سرتېرو تر ایستلو مخکې خپل سفارت په افغانستان کې تړي او تر هغه وروسته به یې ټول سرتېري له افغانستان وباسي.
په کابل کې د استرالیا سفارت، د دغه هېواد لومړي وزیر او د یاد هېواد د بهرنیو چارو وزارت په تازه څرګندونو کې ویلي چې په افغانستان کې یې د خپلو ډيپلوماتانو او ماموریت د امنیت د تامین وړتیا او امکانات نه لري، نو له همدې امله یې پرېکړه کړې چې په موقته توګه یې خپل سفارت په کابل کې وتړي. د سرچینې په خبره، دغه پرېکړه یې موقتي ده او همدا چې وضعیت سم شي، بېرته به یې ډيپلوماتان افغانستان ته راستنېږي او خپل ماموریت ته به ادامه ورکوي.
د استرالیا سفارت ټینګار کړی چې په کابل کې یې د سفارت د تړلو پرېکړه له دغه هېواد سره د ډيپلوماتیکو اړیکو د پرېکولو په مانا نه ده، بلکې دوی هڅه کوي له افغانستان سره خپلې اړیکې وپالي او په سیمه کې یې شته ډيپلوماتان به د افغانستان چارې تنظیموي. د سرچینې په خبره: «زموږ ماموریت دوام کوي، د افغانستان اړوند ډيپلوماتان به دلته له کوم بل نږدې هېواد خپلې چارې تنظیموي او وخت ناوخت به افغانستان ته سفرونه کوي».
بلخوا افغان حکومت بیا د استرالیا پر دې پرېکړه غبرګون ښودلی او وایي چې دوی د استراليايي حکومت له دې پرېکړې خبر وو، خو تمه لري چې د سفارت تړل کېدل موقتي وي. د افغانستان د بهرنیو چارو وزارت له لوري په خپره شوې اعلامیه کې راغلي افغان حکومت د بهرنیو ډيپلوماتو او ډيپلوماتیکو دفترونو د امنیت تامین ته ژمن دی او د دغو دفترونو د امنیت لپاره یې ټول امکانات کارولي دي، نو له همدې امله دوی ته ډاډ ورکوي چې هېڅ ډول ګواښ یې فعالیتونو ته متوجه نه دی. د سرچینې په خبره: «موږ ټولو سفارتونو او ديپلوماتیکو مامورینو ته د امنیت ډاډ ورکوو، دوی ته هېڅ راز ګواښ نه دی متوجه او د امنیت لپاره یې بشپړ تدابیر لرو».
وسله والو طالبانو بیا ویلي چې دوی په افغانستان کې بهرنیو ډيپلوماتانو او مرستندویه موسسو ته امنیت ډاډ ورکوي او فعالیتونو ته یې هېڅ راز خطر نه متوجه کېږي. د طالبانو د قطر دفتر ویاند ډاکتر نعیم بهرنیو رسنیو ته ویلي چې دوی په افغانستان کې د مرستندویه موسسو فعالیت ته چې په بشري برخه کې کار کوي زمینه برابروي او ډاډ ورکوي چې هېڅ راز ګواښ یې فعالیتونو ته نه متوجه کېږي.
بلخوا په ټولنیزو رسنیو کې د عامو افغانانو ترمنځ بیا د ډيپلوماتیکو دفترونو تړل کېدو اندېښنې پارولې دي. په ټولنیزو رسنیو کې د افغانستان د سیاسي وضعیت څارونکو او د نظر خاوندانو ویلي چې ډيپلوماتیک ماموریت درېدل او یا د دفترونو بندېدل د جګړې د ښکېلو لورو لپاره د خطر زنګ دی او له دې ښکاري چې دوی د سولې پر ځای پر جګړه تمرکز کړی دی. کاروونکي پر دواړو لورو غږ کوي چې ژر تر ژره د سولې لار خپله کړي او په دې توګه له نړۍ سره جوړ شوي پلونه دې اباد پرېږدي.