افراسیاب خټک: امریکا په سیمه کې د جګړو د دوام لپاره پراخ پلانونه لري

د پښتونخوا وتلي سیاستوال افراسیاب خټک په خپله یوه تازه خپره کړې مقاله کې ویلي چې امریکا په سیمه کې د جګړو د ختمولو پلان نه لري او په خبره یې دغه هېواد غواړي له طالبانو سره د تازه اړیکو پر مټ په ټوله مرکزي اسیا کې ناندرۍ او کشمکشونه رامنځ ته کړي. دده په وینا امریکا نه غواړي په سیمه کې اقتصادي تحرک رامنځ ته شي او په ۲۱مه پېړۍ کې دوی ته نوې ستونزې وزېږي له همدې امله په پاکستان کې د طالبانو پر مرکزونو او ددغه ډلې پر خونړیو جګړو سترګې پټوي. دده په خبره د طالبانو او امریکا د اړیکو نوی باب ښایي په سیمه کې پراخو ستونزو ته لار پرانیزي. افراسیاب خټک دغه راز وایي چې له امریکا سره پاکستان او ددغه هېواد استخباراتي ادارې هم ملګرې دي او دوی تر شدید څار او پراخو مالي مرستو لاندې طالبانو ته نوي کسان روزي او زرګونه مدرسې یې فعالې کړې دي. خټک ادعا کوي چې په پاکستان کې د طالبانو شاوخوا ۳۶ زره مدرسې فعالې دي چې هره ورځ ترې لسګونه طالبان فارغېږي او له دې ډلې ډېری یې افغانان دي. خټک داسې مهال دغه ادعا کوي چې طالبان وايي دوی د سولې او په افغانستان کې د یوه اسلامي نظام د جوړېدو په لټه کې دي. افغان حکومت هم د طالبانو جګړه د پاکستان د ګټو جګړه بولي.