سعودي کې افغان سفیر: پاکستان کې نور د افغانستان خلاف څوک فتوا نشي ورکولی

په سعودي عربستان کې د افغانستان سفیر احمد جاوېد مجددي وایي چې د مکې مکرمې د علماوو کنفرانس ډیرې ښې لاسته راوړنې درلودې او د دې کنفرانس د پرېکړو د عملي کولو لپاره یو کمېسیون جوړ شوی دی. مجددي وایي چې سوله د افغانستان د خلکو او حکومت اصلي غوښتنه ده، او په دې برخه کې د پاکستان د علماوو ملاتړ اړین وو. نوموړی وایي، چې د پاکستان دیني عالمانو اوسنۍ جګړه تحریم کړه او هر ډول تاوتریخوالی چې افغانانو او عام المنفعه ته زیان رسوي، مردود وګڼل. ده وویل چې د یاد کنفرانس پای کې د یوه کمیسیون جوړولو پرېکړه وشوه، چې دوی به هر وخت ناستې کوي او د کنفرانس د اعلامیې او پرېکړو د عملي کولو په اړه به سلا مشورې کوي. د هغه په وینا، دا کمیسیون به په پاکستان کې د افغانستان خلاف د فتواګانو ورکولو او تاوتریخوالي ته د هوا ورکولو د هڅو مخنیوی هم کوی.