امریکا د طالبانو کړنې د سولې له روحیې سره په ټکر کې بللې دي. د امریکا د بهرنیو چارو وزیر په یوه خبري کنفرانس کې د خبرو پر مهال ویلي دوی غواړي ډاډه شي چې طالبان په رښتیا د سولې غوښتونکي دي کنه. د بلینکن په وینا طالبانو دمګړی جګړې شدیدې کړې دي چې د جګړو دا شدت د سولې له خبرو سره همغږی نه دی. هغه ټینګار کړی چې په افغانستان کې هېڅ لوری هم د زور له لارې واک ته نه شي رسېدلی او نه هم امریکا ددې ملاتړې ده چې په افغانستان کې دې جګړه او تاوتریخوالی دوام وکړي او تر څنګ یې دې یو ځانګړی لوری د خلکو له خوښې پرته ځان واک ته ورسوي. امریکا دا څرګندونې داسې مهال کوي چې د سولې خبرې دمګړی په ټپه ولاړې دي خو جګړې د هېواد په ګوټ ګوټ کې خورې شوې دي.
