امریکايې ځواکونو؛ په بغلان او کندوز کې پر طالبانو هوايي بریدونه کړي

فاکس نیوز د امریکا په دفاع وزارت کې د یوې سرچینې له قوله ویلي چې د امریکا هوایي ځواکونو پرون په بغلان او کندوز ولایتونو کې پر طالبانو د بې پیلوټه الوتکې بریدونه کړي دي. د سرچینې په وینا، د امریکایي سرتېرو په دغو هوایي بریدونو کې یو شمېر طالبانو ته مرګ ژوبله اوښتې ده. د امریکا پوځ تر دې وړاندې هم ویلي چې د اړتیا په صورت کې به د افغان سرتېرو هوایي ملاتړ او پر طالبانو بریدونه کوي. خو طالبان بیا دا څه په دوحه کې د امریکا او دوی تر منځ د شوې هوکړې خلاف عمل بولي. د امریکا د پوځ له لوري دا بریدونه پر داسې مهال ترسره کېږي چې په دې وروستیو کې د افغان سرتېرو او طالبانو تر منځ جګړو زور اخیستی او ځینې ولسوالۍ د دواړو لورو تر منځ لاس په لاس شوې دي.