مذاکراتي پلاوی؛ تاوتریخوالی پر بین الافغاني مذاکراتو منفي اغېز کوي

په قطر کې د افغان حکومت مذاکراتي پلاوي خپلمنځي غونډه کړې ده. د راپورونو له مخې په دې غونډه کې په افغانستان کې پر روان تاوتریخوالي او د سولې پر ټپه ولاړو مذاکراتو خبرې شوې دي. افغان پلاوي ویلي چې د تاوتریخوالي ډېرېدل د سولې خبرو ته زیان رسوي نو له همدې امله دواړو لورو ته په کار ده چې تر جګړې پر سولې تمرکز ډېر کړي. دوی همدا راز ټینګار کړی چې د سولې لپاره به خپلې هڅې ډېروي. دا غونډه داسې مهال کېږي چې په دوحه کې مذاکرات په ټپه ولاړ دي. طالب لوری افغان حکومت ددې مذاکراتو د ځنډ لامل بولي خو حکومتي پلاوی بیا وایي چې طالبان خبرو ته نه حاضرېږي او په مذاکراتو کې نرمښت نه ښيي نو ځکه خبرې په ټپه ولاړې دي.