ملگري ملتونه وايي، په افغانستان کې د روانو جګړو، کرونا وبا او وچکالۍ له کبله د میلیونو افغانانو ژوند له جدي ګواښ سره مخ دی. په افغانستان کې د یاد سازمان مرستیال رامز اکبروف په کابل کې د یوې خبري غونډې پرمهال وویل، که څه هم دغه سازمان روان کال له ۳.۷ میلیونو افغانانو سره بشري مرستې کړي، خو په خبره یې، لا هم د دغه هېواد درېیمه برخه نفوس بېړنیو بشري مرستو ته اړتیا لري. د نوموړي په خبره: «د اوسني بېړني حالت او وچکالۍ له کبله د افغانستان نږدې درېیمه برخه وګړي له بشري ناورین سره مخ دي، د دغه هېواد نږدې نیمايي ماشومان له لوږې او خوارځواکۍ سره لاس او ګرېوان دي، دا وضعیت دردوونکی دی، دوی باید له دې حالته راویستل شي».
اکبروف دغه راز زیاتوي چې افغانستان د اقلیمي بدلون او وچکالۍ له ګواښوونکې څپې سره مخ دی او دې چارې د ډېریو افغانانو ژوند تریخ کړی دی. نوموړی د بشري مرستو پر کارکوونکو بریدونه د اندېښنې وړ بولي او زیاتوي چې یوازې په روان کال کې په دغه هېواد کې د بشري مرستو ۲۵ کارکوونکي وژل شوي او ۶۰ نور ټپیان شوي دي. د هغه په خبره: «دا اسانه نه ده، یوازې په روان کال کې د بشري مرستو د رسونې پر مهال د بشري مرستو ۲۵ کارکوونکو خپل ژوند بایللی، ۶۰ نور ټپیان شوي، زه یو ځل بیا ټینګار کوم چې د بشري مرستو کارکوونکي بې طرفه دي، نو ټول اړخونه باید د دوی د ژوند خوندیتوب ته جدي پام وکړي.»
په افغانستان کې د ملګرو ملتونو د مرستندویه دفتر مرستیال د جګړې له کبله د زرګونو بې ځایه شویو کورنیو پر وضعیت هم اندېښنه وښوده او له ټولو مرستندویه بنسټونو څخه یې غوښتنه وکړه چې د دوی لاسنیوی وکړي.
په ورته مهال د مالیې وزارت سرپرست خالد پاینده هم په یاده غونډه کې خبرداری ورکړ چې په ټول هېواد کې د جګړو، وچکالۍ او کرونا وبا له کبله نږدې ۱۲ میلیونه کسان له ناوړه حالت سره مخ دي. پاینده دغه راز پر نړیوالې ټولنې غږ وکړ، که په روان وضعیت کې د افغانانو لاسنیوی ونه کړي، ښايي په هېواد به ستر بشري ناورین رامنځته شي. د پاینده په وینا: «د بشري مرستو لپاره چې د ملګرو ملتونو او د افغان حکومت له خوا کومه ګډه غوښتنه نن وشوه، باید ټول ورته پاملرنه وکړي، ترڅو له یوه ستر انساني ناورین څخه مخنیوی وشي».
ملګري ملتونه داسې مهال له افغانستان سره د بشري مرستو پر دوام ټینګار کوي، چې دغه هېواد اوسمهال له سختې جګړې، شدیدې وچکالۍ او د کرونا ویروس له وژونکې وبا سره لاس او ګرېوان او میلیونه وګړي یې جدي بشري مرستو ته اړتیا لري.