لانګ ور ژورنال: ټولې افراطي او ترهګرې ډلې په افغان جګړه کې ښکېلې دي

لانګ ور ژورنال په یوه مقاله کې ویلي چې طالبانو د روانې جګړې لپاره له کلونو راهیسې پلانونه جوړول او په سیستماتیکه توګه غواړي د افغانستان ډېره برخه سیمې ونیسي. دغه نشریه وایي چې د القاعده شبکې په ګډون د سیمې ټولې افراطي او ترهګرې ډلې په افغان جګړه کې ښکېلې دي. سرچینه کاږي چې د ازبکستان اسلامي غورځنګ، جماعت انصارالله، لشکر طیبه، جیش محمد او نورې هغه ډلې دي چې دلته په یوه ډول نه په یو ډول په جګړه کې ښکېلې دي. لانګ ور ژورنال لیکي افغان حکومت ته په کار ده چې په دې حساسو شرایطو کې په دقت ګامونه پورته کړي او روان وضعیت په سمه توګه مدیریت کړي. لانګ ور ژورنال داسې مهال دغه څرګندونې کوي چې طالبان په خپلو لیکو کې د بهرنیانو حضور نه مني او افغان حکومت هم په دې باور دی چې دغه ډلې له القاعده شبکې سره خپله اړیکه نه ده پرې کړې.