نړیوال دې پاکستان د طالبانو او نورو ترهګرو ډلو له ملاتړ را وګرځوي. په امریکا کې د پاکستان پخواني سفیر حسین حقاني له سي ان ان سره په خپله یوه تازه مرکه کې ویلي نړیوال ولې په دې سترګې پټوي چې پاکستان له کلونو راهیسې په افغانستان کې د روانې جګړې تر شا دی او په سیمه کې د ترهګریزو فعالیتونو او ورانکاریو ملاتړ کوي. دده په خبره پاکستان لا هم د طالبانو ملاتړ کوي، د هند د کمزوري کولو لپاره یې لسګونه ترهګرې ډلې جوړې کړې دي او ترهګري په واضح توګه د پاکستان د بهرني سیاست تګلاره ده او د پوځ ستره برخه تمرکز د ترهګرو ډلو په روزنه او پالنه دی. حقاني وایي امریکا د پاکستان پر وړاندې هېڅ ډول اقدام نه کوي او که وضعیت همداسې روان وي نو افغانستان به د خونړیو جګړو پر ډګر بدل شي. دده په خبره طالبان له القاعده شبکې سره نه شلېدونکې اړیکې لري او امریکا دې په دې ستر حقیقت سترګې نه پټوي او پر وخت دې د سترو ګواښونو د ختمولو لپاره اقدام وکړي.
