په حکومتي ادارو کې د پراخ فساد د موجودیت له کبله ولسمشر غني د کابیني په غونډه کې د دغو ادارو مشرانو ته خبرداری ورکړ، چې ژر تر ژره دې په ادارو کې د اوسني فساد مخه ونیسي او د نوموړي په خبره، د روان فساد له کبله دې دی نور نړیوالو همکارانو ته نه شرموي.
ولسمشر غني، دغه راز د ډېریو ادارو لخوا د معاشونو د ورکړې پر پروسې هم نیوکې وکړې او د یادو ادارو مشرانو ته یې سپارښتنه وکړه، تر څو د یوه منظم او شفاف سیستم له لارې پر خپل وخت د مامورینو د معاشونو د اجرا لپاره لاس پر کار شي او په دې تړاو دې له مالیې وزارت سره په ګډه خپلې هڅې چټکې کړي. د هغه په خبره: «معاشونه باید پر خپل وخت اجرا شي، چې اوس نه اجرا کېږي، که هره اداره د خپلو مامورینو معاشونه پر خپل وخت اجرا نه کړي، بیا دې ګېله نه کوي».
نوموړي دغه راز د کابیني غړو ته په خپلو خبرو کې وویل چې د افغانستان نړیوال ملاتړي او مرسته کوونکي هېوادونه د خپلو مرستو د ډاډمنتیا په موخه د شفافیت غوښتونکي دي، له همدې کبله هره اداره باید د فساد د مخنیوي او د شفافیت د تامین په موخه کوټلي ګامونه اوچت کړي. نوموړي دغه راز د مالیې وزارت له چارواکو وغوښتل چې خپل ټول پخواني حسابونه تصفیه کړي او په دغه وزارت کې دې د بیروکراسۍ فرهنګ ته پای ټکی کېږدي. ولسمشر غني له نورو وزارتونو او ادارو څخه هم جدي غوښتنه وکړه چې د بودیجې د مصرف په اړه دې اړوندو ادارو په خپل وخت راپور ورکړي ترڅو په دې سره د بودیجې د مصرف په برخه کې د فساد مخنیوی وشي. غني دغه راز وویل: « که نړیوالې ژمنې په خپل وخت او چټکۍ سره اجرا نه شي، له لاسه مو وځي، له همدې کبله مو باید په کار کې چټکتیا ته لومړیتوب ورکړو.»
نوموړي همداراز دولتي ادارو ته سپارښتنه وکړه چې له خلکو سره د معلوماتو د شریکولو په برخه کې دې ټول پراته خنډونه له منځه یوسي، ځکه د هغه په خبره، معلومات د هېڅ ادارې شخصي ملکیت نه دی او باید له خلکو سره شریک کړي.
ولسمشر غني داسې مهال په حکومتي ادارو کې د پراخ فساد له کبله خپل غږ پورته کوي، چې تر دې وړاندې هم ګڼو نړیوالو او کورنیو رسنیو د میلیونو ډالرو فساد په تړاو راپورونه خپاره کړي، خو د افغان چارواکو له ژمنو سره سره، حکومت د دغه فساد په مخنیوي کې پاتې راغلی دی.
