اڅکزی: پاکستان دې افغانستان کې د روانې جګړې له ملاتړ لاس واخلي

د پښتونخوا د ملي عوامي ګوند مشر محمود خان اڅکزی وایي تر هغه چې افغانستان ته امن نه وي راغلی ټوله نړۍ نه شي امن کېدلی. نوموړي د پښتون سیاستوال عثمان خان کاکړ د وژل کېدو د غندلو په مناسبت په یوه جوړه شوې غونډه کې د خبرو پر مهال ویلي چې د افغانستان د جګړې تر شا پاکستان دی او ژر به ددغه جګړې اور اسلام اباد ته هم ورسېږي. دده په وینا پر ټول افغانستان د یوې واحدې جنډې د رپېدو اړتیا ده او نړیوال باید د افغانستان خپلواکۍ ته درناوی وکړي او په دغه هېواد کې دې روانه پردۍ دسیسه او جګړه ختمه کړي. د اڅکزي په خبره د افغانستان امن د ټولې سیمې لپاره مهم دی او تر هغه چې افغانستان ته امنیت او ثبات نه وي راغلي ټوله نړۍ به له نارامۍ سره مخ وي. هغه د پاکستان پر حکومت هم غږ کړی چې په افغانستان کې د روانې جګړې له ملاتړ لاس واخلي، ځکه ادامه به یې ددې سبب شي چې دا اور تر اسلام اباده هم ورسېږي.