د هلمند جګړه؛ یوناما: ژر دې په ښاري سیمو کې جګړې ودرول شي

په افغانستان کې د ملګرو ملتونو استازولۍ (یوناما) د هلمند په مرکز لښکرګاه ښار کې د جګړې له سختېدو سره سم د ملکیانو د ژوند په اړه ژوره اندېښنه څرګنده کړې ده. یادې ادارې ویلي، تازه راپورونه ښیي چې په وروستیو ۲۴ ساعتونو کې په دغه ولایت کې د افغان امنیتي ځواکونو او وسله والو طالبانو ترمنځ سختو جګړو کې ۴۰ ملکي وګړي وژل شوي او ۱۱۸ نور ټپيان شوي دي. د یادې ادارې په خبره، ملګري ملتونه له ښکېلو لوریو ځانګړې توګه له طالبانو غواړي چې ژر تر ژره په ښارې سیمو کې بریدونه ودروي. د ویلو ده چې طالبانو د هلمند پر مرکز برید پیل کړی دی او افغان ځواکونه یې د پر شا تمبولو هڅه کوي، تازه په جنوب کې د میوند قل اردو قومندان جنرال سمیع سادات پر هلمندیانو غږ کړی دی چې د طالبانو تر واک لاندې سیمو څخه ووځي ځکه د نوموړي په وینا، دوی د یادې ډلې پر ضد پراخ ځمکني او هوایي عملیات پیلوي، نو پر همدې بنسټ نه غواړي ملکیانو ته زیان ورسېږي.