په امریکا کې د سمندري توپان له امله ۱۴ کسان مړه شوي

په شمال ختیځه امریکا کې د سمندري توپان او سیلابونو له کبله ۱۴ کسان مړه شوي او ډېری کورونو ته اوبه ننوتې دي. د ایدا نومي دې توپان له کبله په نیویارک، نیو جرسي او پنسلوانیا ایالتونو کې ۱۴ کسانو ته مرګ ژوبله اړولې ده. د یوه دوه کلن ماشوم په ګډون اته کسان په نیویارک کې مړه شوي دي. بل لور ته په فلاډیلفیا کې چارواکو د سختې مرګ ژوبلې یادونه کړې ده، خو جزیات یې نه دي څرګند کړي. چارواکي په دې سیمه کې هم د مرګ ژوبلې زیاتېدو وېره څرګندوي. د نیویارک او نیو جرسي چارواکو په خپلو ایالتونو کې بېړنی حالت اعلان کړی دی.