ملګري ملتونه وایي نړۍ دې اجازه نه ورکوي چې افغانستان بې ثباته او د نا امنیو خوا ته لاړ شي. د ملګرو ملتونو د کډوالو د عالي کمېشنرۍ مشر په تازه څرګندونو کې ویلي چې نړۍ له دوه انتخابونو سره مخ ده، یا به منزوي افغانستان په ګډوډیو او نا امنیو کې پرېږدي او یا به ددغه هېواد د ثبات لپاره د طالبانو له حکومت سره د خبرو لارې چارې پيدا کوي. فليپو ګراندې ټينګار کړی چې طالبان او نړیواله ټولنه باید ژر تر ژره د تفاهم لار خپله کړي او د دایمي ثبات د ساتلو او افغانستان د ژغورلو لپاره دې ګډې لارې چارې ولټوي. هغه پر نړيوالو غږ کړی چې افغانستان دې وژغوري، خپلو مرستو ته دې ادامه ورکړي او دغه هېواد دې په نا امنیو او بې ثباتیو کې نه پرېږدي. ګراندې ټینګار کړی چې د نړیوالې ټولنې او طالبانو ترمنځ ګډ کار د افغانستان د ثبات لپاره خورا مهم دی.
