د افغانستان ا.ا ویاند ذبیح الله مجاهد یو ځل بیا ټینګار کړی دی چې یوازې افغانستان نړیوال رسمیت ته اړ نه دی بلکې نړۍ هم مجبوره ده د خپلو مشروع منافعو لپاره افغانستان په رسمیت وپېژني. د نوموړي په خبره، دوی د نړیوال رسمیت پېژندلو لپاره ټاکل شوي شرایط پوره کړي دي او ژر ده چې په رسمیت وپېژندل شي. هغه دغه راز ویلي چې دوی د امریکا په ګډون له ټولې نړۍ سره ډیپلوماټیکې او دوستانه اړیکې غواړي خو هیڅ هېواد ته د پوځي حضور اجازه نه ورکوي. مجاهد نن یو شمېر هېوادونو ته د ا.ا د چارواکو د سفرونو په اړه د معلوماتو د وړاندې کولو پر مهال ویلي چې وروستي سفرونه له لاسته راوړنو ډک وو. هغه زیاته کړې چې د پاکستان د بهرنیو چارو له وزیر شاه محمود قریشي سره په خبرو کې یې پر ډېرو موضوعاتو مهم بحثونه کړي دي. د نوموړي په وینا تر راتلونکو څو ورځو به د افغانستان-پاکستان تر منځ دروازه د ۲۴ ساعتونو لپاره پرانیستل شي، د وېزو برخه کې به اسانتیاوې رامنځته کېږي او ناروغانو ته به په دروازو کې د وېزې ورکړې زمینه مساعدېږي. نوموړي د افغان او چینایي چارواکو لیدنې ته په اشارې ویلي چې د دواړو هېوادونو ترمنځ به سوداګریزې او دوه اړخیزې اړیکې لا پراخېږي او چین ته به د افغانستان د وچې میوې د لېږلو لپاره امکانات برابرېږي. ذبیحالله مجاهد دغه راز څرګنده کړې ده چې د مسکو ناسته کې د افغانستان د کنګل شوې مالي پانګې پر ازادولو ټینګار شوی دی او دوی ډاډ ورکړی دی چې له افغانستان څخه به هیڅ بل هېواد ته ګواښ نه پېښېږي.