په پاکستان کې د پښتون ژغورنې پر غورځنګ د بریدونو په دوام یو ځل بیا ناپېژانده وسله والو د دغه غورځنګ پر مهم غړي سردار عارف وزیر برید وکړ چې وروسته یې د سختو ټپونو له امله سا ورکړه. نړیوالو بنسټونو او په سیمه کې مشهورو سیاستوالو دغه برید غندلی او پر پاکستاني حکومت یې غږ کړی چې د برید عاملین دې ژر تر ژره د قانون منګولو ته وسپاري. بلخوا د پښتون ژغورنې غورځنګ ځینې غړي په څنګزنه توګه د پاکستان حکومت د دغه برید په ترسره کولو تورنوي او خبرداری ورکوي چې د دوی زغم نور ختم شوی دی او باید خپل غچ واخلي.
وړمه ورځ جمعه ماښام مهال د سویلي وزیرستان په واڼه کې وسله والو کسانو پر عارف وزیر برید وکړ. هغه په لومړي سر کې سخت ټپي و او د سیمه ییز روغتون په عاجله څانګه کې بستري شو، خو پرون یې په اسلام اباد کې په یوه روغتون کې د سختو ټپونو له امله سا ورکړه. د راپورونو له مخې، عارف وزیر د خپلې کورنۍ اتلسم غړی دی چې د پاکستاني حکومت او استخباراتو د ظلمونو له امله وژل کېږي.
دغه پېښې په ټولنیزو رسنیو کې پراخ غبرګون پارولی دی. د ټولنیزو رسنیو کاروونکو پاکستاني حکومت تورن کړی چې د دغه ډول کړنو ترشا ولاړ دی او د پښتون ژغورنې، یا بلوڅانو د دفاع او همدا راز د پښتنو نور فعالین د دغه حکومت د استخباراتي کړیو له لوري په نښه کېږي. د ټولنیزو رسنیو فعالینو په ټوېټر او فېسبوک کې د بشري حقونو له نړیوالو فعالینو او بنسټونو غوښتي چې د دې پېښې په اړه خپل دریځ روښانه کړي.
په ورته وخت کې د بښنې نړیوال سازمان هم بیا پر دغه پېښه غبرګون ښودلی دی. دې ادارې پر خپله ټوېټر پاڼه لیکلي چې د بشري حقونو د فعال عارف وزیر د وژل کېدو په اړه دې هر اړخیزې څېړنې او پلټنې وشي. د بښنې نړیوال سازمان وایي چې د پېښې عاملین باید په ګوته شي او له قانون سره سم حساب کتاب ورسره وشي. د سرچینې په خبره: ((پاکستاني چارواکي باید په سوېلي وزیرستان کې د پښتون ژغورنې غورځنګ پر یوه غړي عارف وزیر د برید په اړه خپلواکه او اغېزناکه څېړنه وکړي. له مشکوکو جنایتګرو سره باید حساب وشي)).
دلته په افغانستان کې هم ګڼو پښتنو فعالینو او سیاستوالو دغه برید په کلکو ټکو غندلی دی او د عارف وزیر وژل کېدل یې ستر بشري جنایت بللی دی. پخواني ولسمشر حامد کرزي په دې تړاو په خپاره کړي پیغام کې ویلي، د سردار عارف وزیر پر وژل کېدو خواشینی دی. نوموړي په دې تړاو د خپلې خواخوږۍ مراتب د پښتون ژغورنې غورځنګ له غړو او مشرتابه سره شریک کړي دي.
د پښتونخوا وتلي سیاستوال او پخواني سناتور افراسیاب خټک هم به دې اړه غبرګون ښودلی دی. نوموړي بیا ویلي چې پر پښتنو د ظلم دا لړۍ له کلونو راهیسې روانه ده او اوس د دې وخت دی چې پښتانه سیاستوال خپله چوپتیا ماته کړي. د ده په وینا: ((د عارف وزیر وژل کېدل پښتنو ته د زورواکو پیغام دی. پښتانه مشران باید خپل غږ پورته کړي، کنه دا چاره به همداسې روانه وي)).
د پښتون ژغورنې غورځنګ یوه مخکښ غړي محسن داوړ بیا پر خپل ټوېټر په خپاره کړي پیغام کې ویلي چې دا د ښو ترهګرو کار دی. ښه ترهګر پاکستاني حکومت هغو وسله والو ډلو ته وایي چې د پاکستان د ګټو لپاره جګړه کوي او یا په یو ډول د دغه حکومت ملېشې دي. د داوړ په خبره: ((د زړه له تله خپه یو چې زموږ یو ملګری عارف وزیر د ټپونو له کبله ومړ. د نوموړي پلار او ورو هم څو کاله مخکې اورپکو ووژل. علي وزیر د “ښو ترهګرو” له خوا ووژل شو)).
تر دې وړاندې پاکستاني حکومت د دغه غورځنګ ګڼ غړي نیولي او یا یې ځورولي دي. څه موده مخکې یې د دغه غورځنګ مشر منظور پښتین نیولی و چې تر اونیو بند وروسته یې بېرته خوشی کړ. اوس د پښتون ژغورنې غورځنګ مشرتابه ګواښ کړی چې نور به د دغه روان ناتار په مقابل کې چوپ نه پاتې کېږي.