راپور: بریټانوي عسکرو ګڼ بې دفاع افغان اسیران وژلي دي

بي بي سي انګلیسي د یو راپور په خپرولو سره د بریټانیا د ځانګړو ځواکونو د یو شمېر هغو عسکرو له قوله چې په افغانستان کې یې ماموریت ترسره کړی دی ویلي چې بریټانوي ځواکونو په افغانستان کې ګڼ شمېر بې دفاع اسیران وژلي دي او بیا یې اسناد او شواهد له منځه وړي دي. راپور کې راغلي، د بریټانیا ځانګړو ځواکونو په داسې حال کې دا بې دفاع اسیران وژلي دي چې د هغوی له لوري دوی ته هیڅ راز ګواښ هم متوجه نه وو. په راپور کې راغلي چې بریټانوي عسکرو په ۲۰۱۷ میلادي کال کې اووه تنه هغه بې دفاع افغانان هم وژلي دي چې هڅه یې کوله ځانونه پټ کړي. د یادونې ده چې وړاندې تر دې هم د ناټو عسکرو په افغانستان کې ورته وژنې کړې دي خو د څېړنو تر ژمنې ورهاخوا یې په اړه هیڅ عملي اقدام نه دی شوی.