غواړی په خپلو کارونو کې مو غوره اوسی؟ که مو ځواب مثبت وي، نو دغه جمله په لوړ اواز تکرار کړئ: «زه غواړم تر ټولو غوره اوسم.» پرېږدئ چې د دغه غږ انعکاس مو ذهن ته داخل شي او په ناخبره ضمیر کې مو ثبت شي. «زه غواړم تر ټولو غوره اوسم!»
تاسو کولای شی په هغه چا باندې بدل شی چې غواړی او خوښېږي مو، خو لومړی باید دا باور وکړئ چې تاسو کولای شی. کله مو چې دغه ډول فکر وکړ، بیا وروسته په عمل کې د ثابتولو لپاره لاس پر کار شئ. که غواړی په تر ټولو غوره ډاکټر، انجنیر، وکیل او یا هم هر بل مسلکي کس چې ستاسو خوښېږي، بدل شی، نو د یو څه وخت لپاره مطالعه وکړئ او زده یې کړئ. دومره مطالعه وکړئ او معلومات ترلاسه کړی چې په هغه برخه کې تر ټولو غوره وی، نه یو معمولي مسلکي کس. د غوره والي لپاره باید خپله ټوله هڅه وکړئ. زه خو په دې اند یم چې که غواړو د ځان لپاره یو مسلک وټاکو، نو د یوه غوره مسلکيتوب لپاره باید خپله ټوله هڅه په کار واچوو.
که غواړی تر ټولو ښه او غوره هنرمند شی، نو ډېر وخت باید تمرین ته ورکړئ. تمرین په اړونده برخه کې ستاسو د پیاوړتیا لامل کېږي او په ټول توان باید دغه کار وکړئ. هغه کسان چې نن بریالي دي، هېڅ داسې کومه بله ځانګړتیا نه لري. هغوی هم معمولي نارینه او ښځې دي، خو څه شی چې د دوی د بریا لامل شوي، هغه هڅه ده. کله چې نور تسلیم شول، دوی تسلیم نه شول او خپلې هڅې ته یې دوام ورکړ. په داسې حال کې چې ځینې په دې قانع شول چې همداسې معمولي اوسي او عادي ژوند ولري، دوی قانع نه شول او غوښتل یې چې باید د لوړې کچې ژوند ولري، نه داسې چې لاس یې بل ته غځولی وي او یا له بل چا سره کار وکړي. دوی غوښتل داسې کار وکړي چې نور خلک ور سره په کار شي او د نورو خلکو لاسنیوی وکړي او خیر یې ورته ورسېږي. تاسو هم کولای شی ځانګړي اوسی. یوازې اړتیا دا ده، هر کار چې کوی، ښه ډېر زیار پکې وباسئ او هڅه وکړئ. بل ګام واخلئ، ډېره هڅه وکړئ او مه تسلیمېږئ. تاسو چې کوم خبر لولی، کېدای شي عنوان یې داسې وي؛ اووه کلن ماشوم کولای شي ډېره تېزه او په تر ټولو غوره بڼه پیانو وغږوي، خو دوی دا نه وایي چې دغه اووه کلن هلک هره ورځ لس ساعته تمرین کوي، څو وکولای شي غوره پیانو وغږوي.
بریا خپله یو ځانګړی او ساده فورمول لري. ټوله هڅه وکړئ. خلک له دې کار سره مینه لري. یوازې دا هم بسنه نه کوي چې ټوله هڅه وکړئ. لومړی باید پوه شی کوم کار باید وکړئ، کله مو چې موخه روښانه کړی، بیا هغه وخت خپله ټوله هڅه پکار واچوی. له معمولي نړۍ سره خدای پاماني وکړئ او ځان مه پکې محدودوئ. پیل یې کړئ، یو ساعت زیاته مطالعه وکړئ، یو ساعت زیات تمرین وکړئ. یوازې همدومره کافي ده چې پر خپل اړوند فعالیت یو ساعت نور فعالیت ور زیات کړئ. خپله ټوله هڅه وکړئ او هدفمند ژوند پیل وکړئ. تل له خپل ټول توان څخه کار واخلئ. څه چې نن کری، سبا به یې هرو مرو رېبئ. کله چې په دفتر یا بل کارځای کې کومه پروژه او دنده در سپارل کېږي، نو هڅه وکړئ چې په تر ټولو ښه بڼه یې سرته ورسوئ او مدیر ته یې تسلیم کړئ. داسې کار وکړئ چې در پام یې شي. کار داسې ترسره کړئ، چې کله یې ورته سپاری، خوشاله شي او ټول وخت د یوه تکړه او پیاوړي انسان حساب در باندې وکړي. هر کار ښه کار کېدای شي، خو په دې شرط چې تاسو خپله هڅه وکړئ او په تر ټولو غوره بڼه یې تر سره کړی او هڅاند اوسی. کله چې تاسو خپله د کار د ښه والي لپاره هڅه کوی، نو د هغه کس لپاره هم ارزښت پیدا کوی چې دنده یې درته سپارلې ده. دوی هرو مرو ستاسو د کار قدر کوي او ارزښت درکوي. دغه څه نه یوازې په کاري محیط کې صدق کوي، بلکې د یوې مور، یوه پلار یا د ژوند د شریک په توګه هم باید تر ټولو غوره اوسئ، څو مو اولادونه یا د ژوند ملګری در باندې باور وکړي او ترڅنګ مو واوسي، مینه درسره وکړي او ستاسو په څېر شي.
که په داسې یوه موقعیت کې وی، چې له کارځایه بل شرکت او یا بل ښار ته واستول شی، نو خپلې چارې داسې ترسره کړئ چې بل وخت هم د دغه کار لپاره تاسو وټاکل شئ؛ ځکه په دې سره به تاسو یو متفاوت ژوند تجربه کړئ.
چارلېز ګینګزلي ویلي: «دا چې ځان مجبور کړئ، څو یو کار تر سره کړئ او خپله ټوله هڅه وکړئ پر ځان کنټرول، ملګرتیا، هڅه، د ارادې قوت، رضایت، خوښي او نور زرګونه ځانګړتیاوې په تاسو کې پیاوړې کېږي. دا هغه ځانګړتیاوې دي چې یو پیاوړی او بریالی کس یې لري.» که تاسو هڅاند وی او د یوه کار د تر سره کولو په لټه کې وی، هرو مرو به یې ترسره کړئ.
موږ ټول د یو څه وخت لپاره په دې خاورینه کُره کې ژوند کوو او نن یا سبا به له دې نړۍ څخه سترګې پټوو، خو دا چې تر څه وخت پورې ژوندي وی، له ژونده خوند واخلئ، خلکو ته خیر ورسوئ، د بېوزلو کسانو لاسنیوی وکړي او د ژوند له هرې شېبې ګټه پورته کړئ. تاسو باید تل روغ، پیاوړي او هوښیار اوسئ، څو هم د ځان او هم د نورو لپاره یو څه وکړای شی. په دې نړۍ کې ډېر ښه کارونه شته چې تاسو یې باید تر سره کړئ. نړۍ تاسو ته اړتیا لري او تاسو باید دغه اړتیا پوره کړئ.