ملګري ملتونه وایي د افغانستان ګاونډي دې خپلو پولو کې پر کډوالو سختۍ نه راولي. د کډوالو په چارو کې د ملګرو ملتونو عالي کمېشنرۍ په تازه څرګندونو کې ویلي، چې د افغانستان ګاونډي هېوادونه لکه، پاکستان، ایران او تاجکستان دې پر افغان کډوالو فشارونه او سختۍ ودروي او خپلې پولې دې د دوی پر مخ پرانیزي.
یادې ادارې ویلي چې په وروستیو کې د افغانستان د ګاونډیو هېوادونو له لوري د کډوالو ایستل ډېر شوي چې دا مسله د اندېښنې وړ ده او یاد هېوادونه دې له دغه چارې لاس په سر شي. د کډوالو عالي کمېشنرۍ دغه راز له مرستندویه هېوادونو غوښتي چې له کډوالو او بېځایه شوو سره مرستې وکړي او د زرګونه افغانانو ژوند وژغوري.
