د امریکا د ملي امنیت سلاکار جک سلیوان له افغانستان څخه د خپلو ځواکونو د ایستلو دفاع کړې ده او زیاته کړې یې ده چې په دغه هېواد کې یې ترسره کړی ماموریت بریالی و او بلاخره یې په افغانستان کې خپل جنګي او ډیپلوماټیک ماموریت په مؤثره توګه پای ته ورساوه. هغه تېره ورځ په واشنګټن کې خبریالانو ته ویلي چې که څه هم خلک د سرتېرو د ایستلو پر څرنګوالي نیوکې کوي خو د ده په خبره دوی بلاخبره دغه ماموریت په ډېر ښه شکل پای ته رسولی دی. هغه دغه راز له افغانستان څخه د امریکایي سرتېرو د وتلو ننګه کړې ده او څرګنده کړې یې ده چې په دغه هېواد کې د امریکا په مشرۍ بې مانا جګړې باید پای موندلی وای. نوموړی دا څرګندونې پر داسې مهال کوي چې جوبایډن له افغانستان څخه د سرتېرو د ایستلو د څرنګوالي له امله د خلکو له توندو نیوکو او کرکې سره مخ شوی دی.
جک سلیوان: افغانستان کې مو ماموریت بریالی و
