قطر او ترکیه غواړي چې په افغانستان کې د پنځه هوایي ډګرونو د مدیریت چارې تر لاسه کړي. د ترکیې د بهرنیو چارو وزیر مولود چاووش اوغلو ویلي چې ترکیه به د قطر سره په ګډه د افغانستان د پنځه هوایي ډګرونو مسوولیت پر غاړه واخلي. اوغلو ویلي چې ترکیه او قطر کیدای شي دا موضوع د راتلونکې چهارشبنې په ورځ د افغانستان له نوي حکومت سره شریکه کړي. د یادونې ده چې ترکیې وړاندې تر دې هم د کابل د هوایي ډګر د امنیتي چارو د پر مخ بیولو غوښتنه کړې وه خو ا.ا یې په غبرګون کې ویلي وو چې دوی د دغه هوایي ډګر د امنیت ساتنه کې هیڅ بهرني ځواک ته اړتیا نه لري او که چېرته ترکیه غواړي په تخنیکي چارو کې مرسته وکړي نو دوی یې هرکلی کوي.
