په کابل کې پرون ګڼو کسانو لاریون وکړ او له امریکا یې وغوښتل چې د افغانستان کنګل شوې شتمنۍ را خلاصې کړي. لاریونوالو وویل چې امریکا دې پر اسلامي امارت د فشار لپاره افغان ولس له ستونزو سره نه مخ کوي، ځکه چې دا چاره د ټولو بشري ارزښتونو خلاف چاره ده. لاریونوالو پر نړیوالې ټولنې غږ وکړ چې د افغانستان د کنګل شوې شتمنۍ په را خلاصولو کې مرسته وکړي، ځکه چې دې چارې په افغانستان کې اقتصادي ستونزې او غربت زیات کړي او که همداسې بندې وساتل شي، نو روان بشري ناورین به لاپسې پراخ شي.
دا واقعیت دی چې په افغانستان کې د اسلامي امارت له واکمنۍ وروسته اقتصادي حالت خراب شوی، بې کاره، لوږه او غربت زیات شوي دي. دا نور لاملونه هم لري، خو تر ګردو ستر لامل یې د افغانستان په تړاو د امریکا تګلاره ده چې نه یوازې د افغانستان شتمني یې کنګل کړې، بلکې پر افغانستان یې نور محدویتونه هم لګولي دي. د امریکايي تګلارې له مخې آن نورو هېوادونو ته هم اجازه نه ور کول کېږي چې افغانستان په رسمیت وپېژني او یا ورسره داسې مرسته وکړي چې د افغانانو په اقتصاد کې مثبت بدلون راولي او غربت کم کړي. امریکا په دې ډول غواړي له یوه اړخه د هغې ماتې غچ واخلي چې په افغانستان کې ورسره مخ شوې ده او له بله اړخه غواړي پر اسلامي امارت فشار راوړي، څو یې د خپلو هغو غوښتنو منلو ته اړ کړي چې تر اوسه نه دي منل شوي. امریکا ددغو غوښتنو له لارې له یوه اړخه غواړي اسلامي امارت له خپلو ارزښتونو را وګرځوي او کمزوری یې کړي او له بله اړخه په افغانستان کې یو ځل بیا یو کمزوری، ویشلی او پر پردیو تکیه حکومت جوړ کړي چې هېڅکله د پیاوړي کېدو توان ونه لري.
د امریکا له خوا د افغانستان د شتمنۍ کنګل ساتل او نور بندیزونه د ټولو هغو ارزښتونو خلاف کار دی چې امریکا یې شعار ورکوي. دا له اسلامي امارت سره نه، بلکې له غریبو او کړېدلو افغانانو سره د امریکا دښمني ده. امریکا او ملګري یې له یوه اړخه په افغانستان کې د ناوړه بشري حالت په اړه خبرې کوي، له بله اړخه بیا پر خپلو هغو تګلارو ټینګار کوي چې دا حالت یې رامنځ ته کړی دی. دوی بیا ددې لپاره چې نړۍ ته ځان بشرپال وښيي له افغانستان د بشري مرستو اعلان کوي، خو پر دې ټول پوهېږي چې دا نه واقعي مرستې دي او نه دا ډول مرستې د افغانستان د روان او زیاتېدونکي بحران مخه نیولی شي. په واقعیت کې دوی یوه دوه مخې لوبه کوي چې غواړي هم د افغانستان خلک له بشري ناورین سره مخ کړي او هم ځان بشرپال وښيي.
امریکا او لوېدیځ باید نور دا دوه مخې لوبه پرېږدي، د افغانستان کنګل شوې شتمني باید خلاصه شي، پر افغانستان لګېدلي بندیزونه باید ختم شي او همدا په افغانستان کې د بشري ناورین د مخنیوي واقعي لاره ده. بشري مرستې ښايي مرسته وکړي، خو هېڅکله زموږ اساسي ستونزه نه شي حل کولی. په کابل کې پرونی لاریون د افغانانو ښه نوښت و او په کار ده چې په کور دننه او بهر ټول افغانان همداسې لاریونه وکړي او خپل غږ پورته کړي.
