د افغانستان ا.ا بهرنیو چارو وزارت وایي، په پام کې لري چې په چین کې د افغانستان سفارت ته نوی سفیر ولېږي. ویل کېږي چې سید محی الدین سادات دغه هیواد ته د لومړي سکرتر او شارژدافیر په توګه لیږل شوی دی. تر دې وړاندې په چین کې د افغانستان پخواني سفیر جاوید احمد قایم ویلي وو چې د شخصي ستونزو له امله یې په بیجینګ کې د سفیر په حیث له خپلې دندې استعفا کړې ده. هغه زیاته کړې وه چې محی الدین سادات د لومړي سکرټر په توګه ور معرفي شوی دی او نوموړی به د یاد سفارت سرپرستي کوي. د یادونې ده چې سید محی الدین سادات په نړیوالو حقوقو کې ماسټري لري او له ډېره وخته راهیسي په قطر کې د طالبانو د سیاسي دفتر غړی و.
