له افغانستان د امریکا وتل د سیالانو د زړه ور کېدو سبب شوه. امریکايي استازي مایکل مک کال یو ځل بیا د بایډن پر حکومت نیوکه کړې چې په بې پلانه او له شرمه ډکه توګه یې خپل سرتېري له افغانستان و ایستل.
دده په خبره د بايډن دا اقدام ددې سبب شو، چې د روسیې، چین او ایران په څېر د واشنګټن ځايي سیالان لا زړه ور شي او دا د امریکا ماتې وبولي. هغه وایي اوس د بايډن حکومت ته په کار ده چې د یادو هېوادونو پر وړاندې معقول اقدام وکړي او اجازه ور نه کړي چې د امریکا ځواک نور هم په نړۍ کې راکم شي.
مک کال وایي ایران دومره زړه ور شو، چې د اټومي وسلو د لرلو هڅه کوي او روسیه فکر کوي چې ګټونکې ده نو ځکه یې اوکراین ته لاس غځولي دي.
