ایران له ډېرې مودې وروسته سعودي عربستان سره ډیپلوماټیکې اړیکې پيل کړې دي. د ایران د بهرنیو چارو وزارت ویاند سعید خطیبزاده هغه راپورونه تایید کړي دي چې ویل کېدل تهران جدې ته درې ډیپلوماټان استولي دي. دوی ښایي وروسته له شپږو کلونو په سعودي عربستان کې د اسلامي همکارۍ سازمان په مقر کې خپله استازولي پرانیزي. د یادونې ده چې له تېرو شپږو کلونو راهیسې د ایران او سعودي ترمنځ هیڅ راز ډیپلوماټیکې اړیکې نه وې خو د دواړو هېوادونو ترمنځ تر وروستیو خبرو اترو وروسته دواړو هېوادونو د اړیکو د ښه کېدو په اړه هیله مندي ښودلې ده.
