نیویارک ټایمز راپور ورکړی دی چې واک ته د افغانستان ا.ا تر رسېدو وروسته یو میلیون افغانان ګاونډي هېواد ایران ته اوښتي دي. راپور کې د لېږد رالېږد د یو خصوصي شرکت د رییس اسماعیل جوانمرد له قوله راغلي چې په ورځني ډول لږ تر لږه څلور زره کسان له افغانستان څخه ایران ته اوړي. هغه زیاته کړې ده چې ایران ته د کډوالۍ لامل په هېواد کې بې کاري او د شغلي او تحصیلي فرصتونو نشتوالی دی. نیویارک ټایمز په خپل دې څېړنيز راپور کې لیکلي دي چې پر افغانستان د امریکا د مالي بندیزونو له امله دغه هېواد له تر ټولو سخت اقتصادي او بشري وضعیت سره مخ شوی دی. ملګرو ملتونو څه موده وړاندې خبرداری ورکړی و چې که له افغانستان سره بشري مرستې ونه شي نو ممکن دغه هېواد له بېساري بشري او اقتصادي ناورین سره مخ شي.
