پند لرونکې جملې، پخواني متلونه، کلیوالي داستانونه او افسانې هغه شتمني ده چې له یوه نسل څخه بل نسل ته لېږدول کېږي او موږ پرته له دې چې یو د بل رنګ، ملیت، مذهب او قومي پولې په پام کې ونیسو، یو له بل سره مو وصلوي. یا دا چې دغه داستانونه مختلفې موضوعګانې لري او هره یوه یې زموږ لپاره یوه سر لاره او بېلګه ده.
د دغو پخوانیو او پند لرونکو کیسو ټولیز مفهوم څه دی؟ زموږ د ډېرو لپاره دا کیسې د نورو له تجربو څخه د ګټې اخیستلو او په خپل ژوند کې د دغو تجربو د کارولو په مانا دي. سکاټلنډي لیکوال «سامویل اسمایلز» د بریالیتوب په اړه خپل لومړنی کتاب په ۱۸۵۹ ز کال کې خپور کړ. دغه کتاب چې ځانګړی نوم یې «له ځان سره مرسته کول» وو، د «ناپېلیون هېل» او «اوریسون سوت ماردن» لپاره یې د دې زمینه برابره کړه، څو په دې برخه کې لیکنې وکړي او له همدې لارې د خلکو ذهنیت د بریا لور ته وهڅوي. ناپېلیون هېل د بریالیتوب د خوځښت بنسټګر او د همدې برخې یو نوموتی لیکوال دی. هغه د بریالیتوب د جامع او هر اړخیزې فلسفې په تړاو ګڼ کتابونه لیکلي دي. نوموړي وروسته له هغې دا کار پیل کړ چې له ځان سره د مرستې کولو په اړه یې د مشهورو او غوره بېلګو، لکه اندرو کارنګي، توماس اډیسن، هنري فورډ… د ژوند په اړه مطالعې تر سره کړې. دا هغه کسان وو چې په مختلفو لارو او وسایلو سره یې وکولای شول خپلو موخو ته د رسېدلو لپاره یو له بل سره ورته رسالت په پوره بریالیتوب سره سرته ورسوي.
د وروستیو ۱۵۰ کلونو په اوږدو کې د بریالیتوب د لارې فیلسوفانو او پوهانو دا ثابته کړه چې د ټولو لویو او کوچنیو بریاوو اساسي او بنسټیزه کلۍ له «استقامت او مبارزې» پرته بل څه نه دي. همدا استقامت او مبارزه وه چې «جورج ګوتالز» ته یې د دې توان ورکړ، څو د «پانامې کانال» له ځلونو ناکامۍ وروسته له سره جوړ کړي او پر خپلو پښو یې ودروي. همدغه استقامت او مبارزه وه چې اډیسن ته یې د دې توان ورکړ، چې برېښایي ګروپ اختراع کړي. همدغه استقامت او مبارزه وه چې «ابراهام لېنکلن» ته یې انګېزه ورکړه چې له بیا بیا ماتو، کاري ناکامیو او په ټاکنو کې له اته ځله ماتې سره سره، وکولای شي چې د امریکا ولسمشر شي.
ناپېلیون هېل لیکي: «د هغه لاملونو له ډلې څخه چې ډېری بریالي کسان تر څلوېښت کلنۍ مخکې بریالیتوب ته نه رسېږي، یو دا دی چې دوی باید په ژوند کې له ګڼو ماتو او ځورېدنو سره مخ شي، ګڼ خنډونه له منځه یوسي او د اړینې پوهې او تجربې له لاسته راوړلو وروسته بریالیتوب او شتمني ترلاسه کړي».
پر دې اساس، یوازې هغه کسان کولای شي په تاریخ کې خپل نوم ثبت کړي چې استقامت او مبارزه ولري او له ماتو څخه د وېرېدو پر ځای ترې درس او زده کړه ترلاسه کړي.
کله مې چې د استقامت او مبارزې کتاب لوست، د هغه ماشوم په فکر کې شوم چې پنځوس کاله مخکې مې پېژانده. نوم یې «سکاټ شاور» وو. هغه زما د ماشومتوب د لوبو ملګری و او کېدای شي چې د نړۍ د کرکجنو ماشومانو له ډلې څخه و. یوه ورځ زموږ تېرې او زیاتې خبرې زموږ تر منځ د دعوې او شخړې لامل شوې. په شاوخوا کې زموږ د خلاصون لپاره هېڅوک نه وو، نو تر هغه مو چې په وس او توان کې وو، شخړه مو وکړه. زه له هغه څخه یو څه لوی او پیاوړی وم او تر هغه مې چې کولای شوای، وهل مې ورکړل! خو هر ځل به چې سکاټ پر ځمکه ولوېد، بیا به را پورته کېده او پر ما به یې حمله کوله.
شونډې یې وینې شوې وې، پر مخ یې اوښکې روانې وې او جامې یې هم شکېدلې وې، خو له دې هر څه سربېره یې بیا هم د غبرګون ښودلو هڅه کوله. د هغه غوسه تر بل هر ځل زیاتېده او له ځمکې څخه به راپورته کېده. کله چې د وروستي ځل لپاره له ځمکې را پورته شو، لاس مې ورکړ او ورته ومې ویل: «سکاټه، تا وګټله!» هغه ماته وکتل، تندی یې وغوړېد او لاس یې راکړ. موږ تر څو تېرو کلونو پورې یو د بل نږدې ملګري وو.
د استقامت او مبارزې کتاب د سکاټ په څېر کسانو له ګڼو کیسو ډک دی. د هغو نارینه او ښځو له کیسو ډک دی چې ماتو ته نه دي تسلیم شوي. دغه کتاب ډېر جذاب دی او د ناپېلیون هېل بنسټ د نورو کتابونو پر سبک ولاړ لیکل شوی دی. دا کتاب د ګڼو نورو په څېر له ځانه سره ساده توب، جذابیت او مثبت فکر لېږدوي او د هغه کسانو د داستانونو په درلودلو سره چې په غوره بڼه یې زموږ نړۍ ته بدلون ورکړی، زموږ لپاره د ژور او ګټور فکر کولو انګېزه او اجازه راکوي. دغه کسان هغه رهبران دي چې د بریالیتوب پر لور یې ځانګړې او لارښود لاره پرانیستې ده چې موږ هم کولای شو همدغه مسیر وڅارو او بریا ته ورسېږو. کېدای شي زموږ موخې د هغوی له موخو سره توپیر ولري او یا زموږ ماتې د هغوی له ماتو او ناکامیو سره هېڅ ورته والی ونه لري، خو د هغوی د ژوند طرز او تګلاره زموږ لپاره بېلګه او الهام بښونکې ده. د هغوی د تګلارو په څارلو او عملي کولو سره کولای شو چې د خپلې بریا او لاسته راوړنو پر لور ګام واخلو.
دغه کتاب د بریالیتوب په اړه ثابت شوي اصول او قوانین بیانوي. هغه اصول او لارښوونې چې پوهانو او مشهورو کسانو تجربه کړي او د خپل ژوند له لوړو ژورو څخه یې د قیمتي ډبرو په څېر یو یو را ټول کړی دی. د دغو خلکو د ژوند داستان موږ ته را زده کوي چې که خپلو ټاکلو موخو ته د استقامت او مبارزې له لارې د عمل جامه ور واغوندو، له شک پرته چې لویه او نه ماتېدونکې بریا زموږ په برخه ده. دغه لارښوونې او داستانونه موږ ته را زده کوي چې ماتې او ناکامۍ باید بریالیتوب ته د رسېدو لپاره د نوو فرصتونو او لارو په مانا تعبیر کړو.
دغه کتاب د یو بریالي ژوند درلودلو لپاره هغه ځلېدونکې کلۍ ده چې اړینه ده د کتابونو له منځه یې را واخلو، ویې لولو او بیا یې هم ولولو. دا کتاب همغه پیاوړې معجزه ده چې له موخو څخه لاس اخیستل او لاس په سر کېدل مو بریا ته د رسېدلو پر هیله او ارزو بدلوي. که غواړی پوه شی چې ولې ناپېلیون هېل وایي چې: «ډېری لویو او بریالیو کسانو خپله بریا له ماتې او ناکامۍ څخه یوه مرحله وروسته لاسته راوړې ده.» نو دغه کتاب ولولئ.
خلاصه دا چې که غواړی رښتینې بریا لاسته راوړی، د لوی انسان کېدو لپاره اړینې لارښوونې خپلې کړی، پر خپلو موخو تمرکز وکړی او بریا ته د رسېدو لپاره له ځان سره پیاوړې ژمنه وکړی، اړینه ده چې یو بالښت تر سر لاندې کېږدی، پښې مو پر دېوال تکیه کړئ، دغه کتاب را واخلئ او یو ځل بیا یې په پوره غور سره ولولئ. بریا ستاسو په تمه ده.