نریندرا مودي له افغان سیکانو او هندوانو سره ګوري

هندي رسنیو ویلي، چې تمه ده د دغه هېواد لومړی وزیر نریندرا مودي له افغان سیکانو او هندوانو سره په نوي ډیلي کې وګوري. هندي زینوز خبري اژانس ویلي، تر دې وړاندې د هند د نړیوالې ټولنې رییس پونیت سنګ چاوندک، مودي ته د یو لیک په استولو له نوموړي افغان سیکانو او هندوانو ته د تابعیت غوښتنه کړې او ټينګار یې کړی و، چې دغو لږکیو ته د ویزو په ورکړه کې اړینې اسانتیاوې رامنځته کړي. چاوندک په دې لیک کې د هند له لومړي وزیر څخه غوښتي، چې د افغان هندوانو د ګورودواراو او معابدو په ساتنه کې ډيپلوماتيکې هڅې وکړي. ورته مهال د هند څوملیتي خبري چینل د هند د نړیوالې ټولنې لیک خپور کړی او ویلي يې دي چې د هند دولت ممکن افغان لږکیو ته اسانتیا رامنځته او نویو غوښتنو ته يې پام او د تابعیت ورکولو په تړاو فکر وکړي.