د افغانستان ا.ا لوی مشر شیخ هبت الله اخندزاده امنیتي ځواکونو ته ځینې نوې سپارښتنې کړې دي. هبت الله اخندزاده امنیتي ځواکونو ته په خطاب کې ویلي چې له غرور او کینې څخه په کلکه ډډه وکړي او له ځورېدلو افغانانو سره احسان وکړي. نوموړي دغه راز له امنیتي ځواکونو څخه غوښتي چې له کبر، جبر، ظلم او خیانت څخه ډډه وکړي او د قوم پرستۍ، سمت پرستۍ او انډيوال پرستۍ څخه هم ځان لرې وساتي. نوموړي زیاته کړې ده چې امتیاز باید په امانتداري سره وي او بیت المال باید خیانت نه شي. په دغو سپارښتنو کې دغه راز راغلي چې ټول امنیتي ځواکونه دې د یو او بل په کارونو کې له مداخلې په کلکه پرهیز وکړي او د یو بل پر وړاندې دې له داسې چارو مخ وګرځوي چې د باور فضا خړپړه کوي.
