د افغانستان د ا.ا د بهرنیو چارو سرپرست وزیر مولوي امیرخان متقي په چین کې د روسیې د بهرنیو چارو له وزیر سرګي لاوروف سره کتلي دي. بهرنیو چارو وزارت وایي چې په دې لیدنه کې دواړو لوریو افغانستان کې پر بشري او اقتصادي وضعیت خبرې اترې کړې دي. د یاد وزارت د معلوماتو له مخې، سرګي لاوروف په یاده لیدنه کې له نړیوالې ټولنې څخه غوښتنه کړې ده چې په افغانستان کې فعال رول ولوبوي او له دغه جګړه ځپلي هېواد سره خپلو مرستو ته دوام ورکړي. په ورته وخت کې متقي د چین ناسته ګټوره بللې ده او زیاته کړې یې ده چې ورته ناستې له روان بحران څخه د افغانستان په ایستلو کې پام وړ مرسته کولی شي.
