ایران په افغانستان کې خپل کونسلي فعالیتونه ځنډولي

ايران په افغانستان کې خپل کونسلي خدمتونه ځنډولي دي. ايراني رسنۍ وايي چې د دغه هيواد د بهرنيو چارو وزارت په تهران کې د افغانستان د سفارت سرپرست وربللی او په دې تړاو يې خپله پريکړه ور اورولې ده. د ايران په بهرنيو چارو وزارت کې د سوېلي اسيا څانګې مشر افغان لوري ته ويلي چې په افغانستان کې به يې کونسلي خدمتونه تر بل امر پورې ځنډېدلي وي. ده زياته کړې چې افغان لوری بايد په افغانستان کې د ايران د ډيپلوماتيک ماموريت امنيت يقيني کړي، تر هغې وروسته به هغه هيواد خپل کونسلي خدمتونه له سره پيل کړي. د کونسلي خدمتونو د ځنډولو په تړاو د ايراني لوري پرېکړه تر هغې وروسته ده چې يو شمېر قهرجنو لاريونوالو پرون په هرات کې د دې هيواد د کونسلګرۍ دروازې ته اور ورته کړ. لاريونوالو په ايران کې له افغان کډوالو سره د غير انساني چلند غندنه کوله.