ملګرو ملتونو په افغانستان کې پر ملکي وګړو وروستي بریدونه غندلي دي. د ملګرو ملتونو عمومي منشي انتونیو ګوتریش په تازه ټوېټ پیغامونو کې ویلي چې په وروستیو کې په افغانستان کې پر ملکي وګړو بریدونه ډېر شوي چې دا مسئله د اندېښنې وړ ده.
دده په خبره دوی په کابل او مزار شریف ښار کې د تېرې اونۍ بریدونه غندي او په دې باور دي چې د ملکي وګړو په نښه کول له ټولو نړیوالو انساني حقونو سره په ټکر کې عمل دی او باید پای ته ورسول شي. ملګرو ملتونو تر دې وړاندې هم په افغانستان کې پر ملکي وګړو بریدونه په کلکو ټکو غندلي او د ورته بریدونو د تکرار د مخنیوي غوښتنه یې کړې ده.
د افغانستان لپاره د ملګرو ملتونو د بشري حقونو په چارو کې ځانګړي استازي هم ویلي چې باید د بریدونو په اړه هر اړخیزه پلټنه وشي او پر ملکي وګړو برید کوونکي باید مجازات کړل شي.
