د پښتو نړيوالې ورځې په مناسبت مو نن د دغې ژبې له يوې چينې کار پوهې سره مرکه کړې چې اورېدو ته يې تاسو رابولو.پښتو ژبه یوه داسې ژبه ده چې د پت، عزت، غيرت، وفادارۍ، صداقت او صمیمیت تاريخ لري.څو کاله وړاندې د افغانستان په پلازمېنه کابل کې دغه ورځ د پښتو ملي ورځې په نوم ونومول شوه او له هغې وروسته هر کال د نړۍ په ګوټ ګوټ کې د پښتنو او پښتو ويوونکو له خوا نمانځل کېږي.له لسګونو کلونو راهيسې په چين کې د پښتو ژبې مينه وال پيدا شوي او په دغه هېواد کې د يادې ژبې د زده کړې څو پوهنتونونه شتون لري.د پښتو ژبې چيني مینه وال او کار پوهان هم دغه ورځ نمانځي.آغلې شیاو بینګ يوه له دا ډول کسانو څخه ده.
هغه پخوا د چين د نړيوالې راډيو د پښتو څانګې مسؤله پاتې شوې او په تېرو څو لسيزو کې يې په چين کې د دې ژبې د پرمختګ او ودې لپاره ډېر خدمتونه کړي او تل غواړي چې د چين او افغانستان ترمنځ د کلتوري تبادلې پل وګرځي.
آغلې شياو بينګ ۷۵کلنه ده او د خپل عمر ډېره برخه يې پښتو ژبې ته په خدمت کې تېره کړې.د هغې په اند پښتو ژبه د ژبو په کتار يې يوه ډېره لرغونې او ثابته ژبه ده چې اوس ګڼ ويوونکي لري او د ژبو په ليکه کې مهم ځای لري. دا وايي چې د پښتو ورځې نومولو يوه ګټه دا ده چې خلک وهڅول شي چې دې ژبې ته لا نور خدمت وکړي.نوموړې د يادې ورځې په مناسبت د نړۍ په ګوټ ګوټ کې مېشتو ټولو پښتنو او پښتو ويوونکو ته مبارکي وويله او زياته يې کړه چې د یوه هېواد د وقار او ملي هويت ملي هويت د سترو ارزښتونو څخه يو هم د هغه هېواد ژبه ده چې د هغې په وسيله خپل فرهنګ او کلتور نورو ته ور پېژني.
هغې همدارنګه ويلي چې په تېرو څو لسيزو کې يې په پښتو ژبه د چین د اقتصاد، سياست او کلتور په باب ډېر معلومات افغان ملګرو ته وړاندې کړي. په ورته وخت کې د پښتو ژبې په مټ يې د افغانستان په اړه ډېر معلومات هم ترلاسه کړي. پښتو ژبه د افغانستان او چین ترمنځ د کلتوري تبادلې په برخه کې مهم رول لوبوي.اوس د چين د کمونيکېشن پوهنتون په شمول په درېيو پوهنتونونو کې د پېښتو ژبې کورسونه جوړ شوي دي.
هغې وويل چې په افغانستان کې د اوسني سرپرست حکومت په واکمنېدو سره د پښتو ژبې زده کړې ته د چينايانو لېوالتيا زياته شوې او ډېر چينايان غواړي چې دغه ژبه زده کړي، ځکه د دواړو هېوادونو ترمنځ د اقتصادي او کلتوري تګ راتګ په زیاتېدو سره د پښتو ژبې د زده کړې اهميت او ورته د خلکو اړتياوې هم ډېرې شوې دي.اوس په افغانستان کې امنيتي وضعيت هم نسبتا شه شوی، نو ځکه ډېری چينايان غواړي چې دغه هېواد ته سفر وکړي.
د نوموړې په وينا چې اوس پښتو ژبې د ډېرو وګړو پام راجلب کړې او دا هم غواړي چې تر وسې پورې د دې ژبې د مروجولو او خپرېدو لپاره خدمت وکړي.
دا وايي چې نړۍ د پښتو ژبې له لارې د افغانستان پېژندلی شي ځکه په وينا يې چې ژبه د کلتوري تبادلې او تفاهم په برخه کې مهم رول لوبوي.هغې په دې اړه ويلي چې په چين کې داسې متل شته چې وايي: (دوستي چې د خلکو تر منځ د نږدې اړیکو څخه ترلاسه کېږي، د دولتونو ترمنځ د سالمو اړیکو کلیدي ده.) نو دا وايي چې پورته متل ته په پام سره ویلای شوو چې چین او افغانستان عنعنوي دوستي لري او خلک يې هم يو له بل سره مينه لري.زه غواړم چې د پښتو ژبې په وسيله د دواړو هېوادونو ترمنځ د دوستۍ د لا ټينګېدو او د دوه اړخيزې کلتوري تبادلې لپاره هڅې وکړم او هيله لرم چې د پښتو ژبې له نورو چينايي مينه والو سره يوځای د دواړو هېوادونو ترمنځ د کلتوري پل رول ولوبوم .